Daxili siyasət

Ana səhifə

Daxili siyasət

Mübariz Əhmədoğlu: “Ermənistan rəhbərliyi danışıq imitasiyasından əl çəkib ikili oyun oynayır”

03 iyun 2010 12:21 (UTC +04:00)

Bakı. Elnur Məmmədli – APA. Siyasi İnnovasiya və Texnologiya Mərkəzi (SİTM) may ayında beynəlxalq və regional aləmdə baş verən ictimai-siyasi hadisələrin ümumi yekunlarına dair hesabatını açıqlayıb. APA-nın məlumatına görə, mərkəzin sədri Mübariz Əhmədoğlu bununla bağlı keçirdiyi mətbuat konfransında Türkiyənin Rusiya ilə bu Qafqaz regionun problemlərini müzakirəyə başlamasını müsbət qiymətləndirib. Onun sözlərinə görə, əgər Azərbaycan Türkiyə-Ermənistan münasibətlərinin normallaşdırılmasının qarşısını almasaydı, Ermənistan çoxdan Türkiyənin təsir dairəsinə daxil ola bilərdi: “Hətta Ermənistandan Rusiyanın hərbi bazalarının çıxarılması məsələsi də gündəmə gələ bilərdi”.

Politoloq Ermənistanda yenilənmiş Madrid prinsiplərinin əleyhdarlarının sayının get-gedə artdığını bildirib: “Azərbaycanın və vasitəçilərin Ermənistandan cavab gözlədikləri bir vaxtda bu ölkənin müdafiə naziri və xarici işlər nazirinin müavini dəfələrlə bəyan etdilər ki, Ermənistanın işğal etdiyi əraziləri qaytarmaq fikri yoxdur. Bu isə onu göstərir ki, Ermənistan rəhbərliyi danışıq imitasiyasından əl çəkib ikili oyun oynayır. Bütün dünya Ermənistandan sülh variantına cavab gözlədiyi bir vaxtda Serj Sərkisyan NATO-dan Azərbaycana qarşı müharibədə kömək istəyir. Bu isə onu göstərir ki, Ermənistan sülh danışıqlarında iştirak etməyə hazır deyil. Verilən cavablar yalnız vasitəçilərin özlərinin şəxsi mövqeyi kimi qəbul edilməlidir”.

Hesabatda həmçinin, ötən ay İran ətrafında baş verən proseslər, ABŞ - Gürcüstan münasibətləri, Mərkəzi Asiya və Аvropadakı bir sıra məsələlər yer alıb.