Daxili siyasət

Ana səhifə

Daxili siyasət

Deputatlar Milli Məclisin növbədənkənar sessiyasının ilk iclasında bir neçə təkliflə çıxış ediblər

08 iyun 2010 10:00 (UTC +04:00)

Bakı. Elbrus Seyfullayev - APA. Milli Məclisin növbədənkənar sessiyasının bu gün keçirilən ilk iclasında çıxış edən deputatlar bir sıra təkliflər səsləndiriblər. APA-nın xəbərinə görə, deputat İqbal Ağazadə Seçki Məcəlləsinə əlavə və dəyişikliklərin növbədənkənar sessiyanın gündəliyinə daxil edilməsini təklif edib. Onun sözlərinə görə, 6 müxalifət partiyasının imzası ilə Seçki Məcəlləsinə əlavə və dəyişikliklər edilməsi ilə bağlı parlamentə göndərilən təkliflərə baxılmalıdır: “Mərkəzi Seçki Komissiyasının yenidən formalaşdırılması, seçki komissiyalarının bərabər qaydada təşkil olunması və digər məsələlərə baxılmalı, “Sərbəst toplaşmaq haqqında” qanunun tətbiqi ilə bağlı paytaxt rəhbərliyi tərəfindən yaradılan problemlər aradan qaldırılmalıdır”.

Deputat Baba Tağıyev Qəzza bölgəsinə humanitar yardım aparan insanlara qarşı İsrail tərəfindən törədilən hərəkəti bəşəriyyətə qarşı cinayət hesab etdiyini, bu addımın humanizmlə bir araya sığmadığını deyib. Deputat, həmçinin Bakının işğaldan azad olunmasında müstəsna xidmətlər göstərmiş Nuru Paşaya abidə qoyulması təklifini səsləndirib.

Millət vəkili Siyavuş Novruzov deyib ki, Seçki Məcəlləsinə əlavə və dəyişiklik olunmalıdır, ancaq burada səslənən təkliflərlə bağlı yox: “Bizim Seçki Məcəlləsində müşahidəçilik, namizədliyin qeydiyyata alınması və seçki komissiyalarının tərkibi ən obyektiv şəkildə əksini tapıb. Sərbəst toplaşmaq üçün yer ayrılır, lakin müxalifətin sosial bazası yoxdur”.

Milli Məclisin üzvü Fazil Mustafa isə “Eks-prezidentlər haqqında” qanun qəbul olunmasının, “Siyasi partiyalar haqqında” qanuna dəyişiklik edilməsinin zəruriliyini vurğulayıb: “Hansı əsasla parlamentdə azlıq təşkil edən partiyaların MSK-dakı yeri boş qalır, YAP-ın namizədi isə gündəliyə daxil edilir. Azlıqda olan partiyaların namizədlərinə də baxılmalıdır. Biz namizəd irəli sürümüşük” .

Spiker Oqtay Əsədov iqtidarın vahid partiyadan ibarət olduğu üçün öz namizədini təqdim etdiyini deyib: “Parlamentdə təmsil olunan müxalifət partiyalarının sayı çoxdur. Bir yerə toplaşın və konkret fikrə gəlin. Bundan sonra müraciət edin, baxaq”.

Deputat Pənah Hüseyn Milli Məclis tərəfindən İsrailin Türkiyəyə qarşı hərəkətini pisləyən bəyanat qəbul olunması təklifi ilə çıxış edib.

Deputat Fəzail Ağamalı da İsrailin Qəzzaya humanitar yardım aparan gəmilərə basqınını pisləyən bəyanat qəbul etməsinin zəruriliyini vurğulayıb.

Deputat Əli Əhmədov Aralıq dənizində baş verən olayla bağlı Milli Məclisin Azərbaycan prezidentinin mövqeyini bölüşdüyünü deyib: “Azərbaycan prezidentinin məsələ ilə bağlı verdiyi bəyanat bizim də mövqeyimizdir”.

Ə. Əhmədov dünyanın heç bir yerində seçki komissiyalarının seçkinin taleyini həll etmədiyini, dəfələrlə seçki komissiyalarının tərkibinin dəyişdirildiyini deyib: “Azərbaycan xalqı bunu istəmir. İndiki format ədalətlidir”.

Parlament sədrinin birinci müavini Ziyafət Əsgərov 2008-ci ilin prezident seçkilərində, 2009-cu ilin referendumunda MSK-ya seçki komissiyaları ilə bağlı heç bir şikayətin daxil olmadığını deyib: “Biz bir dəfə buna getdik. Lakin siz MSK-nın iclaslarına gəlmədiniz. 28 müxalifət partiyası bələdiyyə seçkisində cəmi 8 faiz namizəd irəli sürürsə, hansı potensialla seçki komissiyalarının tərkibinin dəyişdirilməsini istəyirsiniz?”