Daxili siyasət

Ana səhifə

Daxili siyasət

Azərbaycanın hakim partiyası: Seçki Məcəlləsinə dəyişiklik təkliflərini istənilən beynəlxalq təşkilatla müzakirə etməyə hazırıq

11 iyun 2010 14:47 (UTC +04:00)

Hesab edirik ki, Azərbaycanda seçki praktikası və seçki kampaniyasını həyata keçirən müvafiq seçki administrasiyası kifayət qədər böyük təcrübə toplayıb, seçki kampaniyasını yüksək keyfiyyətlə həyata keçirmək iqtidarına malikdir”. APA-nın məlumatına görə, bunu Yeni Azərbaycan Partiyası (YAP) sədrinin müavini, partiyanın icra katibi Əli Əhmədov YAP-ın saytına müsahibəsində deyib.

Ə. Əhmədov bildirib ki, YAP dünya praktikasını öyrənərkən ortaya Azərbaycandan həm ərazisi, həm də əhalisi çox olan ölkələrin özündə belə seçki kampaniyalarının keçirilməsi üçün ayrılan vaxt müddəti 60 gün çərçivəsində və ya daha az olması faktı ortaya çıxıb: “Hesab etdik ki, seçkilərin keçirilməsi üçün 2 ay müddətinin ayrılması heç bir halda onun demokratik mahiyyətinə xələl gətirmir və gətirə bilməz. 60 gün demokratiya prinsipləri də daxil olmaqla bütün seçki prinsip və normalarına tam riayət edilməsi üçün yetərlidir. Bu fikri beynəlxalq praktika da təsdiq edir. Ona görə də YAP tərəfindən irəli sürülən təkliflərin bəzi müxalifət partiyalarının guya Azərbaycanda seçkilərin demokratikliyinə qarşı çevrilmiş addım kimi dəyərləndirilməsi hər cür arqumentdən məhrumdur. Belə yanaşma mahiyyətcə beynəlxalq təcrübəyə ziddir”. Ə. Əhmədov bildirib ki, Azərbaycanda elektoral sistem formalaşıb, seçicilərin çox əhəmiyyətli hissəsinin siyasi simpatiyası müəyyənləşib: “Bu baxımdan siyasi təqdimata elə də ehtiyac yoxdur. O ki qaldı ayrı-ayrı partiya və namizədlərin konkret seçki proqramının və mesajlarının seçicilərə çatdırılmasına, təklif olunan 2 aylıq seçki kampaniyası dövrü və 23 günlük təşviqat müddəti, hesab edirəm, tamamilə kifayətdir”.

Beynəlxalq təşkilatların bu təklifə qarşı çıxmasına gəldikdə, ə. Əhmədov bildirib ki, bununla bağlı onlar istənilən təşkilatla müzakirə aparmağa hazırdırlar. O, YAP-çı deputatların Konstitusiya ilə təmin edilən qanunvericilik təşəbbüsündən istifadə edərək belə bir layihə hazırladığını vurğulayıb: “Beynəlxalq təşkilatların Yeni Azərbaycan Partiyasının belə bir təşəbbüsünə qarşı çıxması, əgər demokratiya prizmasından baxılsa, nə qədər düzgün görünər? İrəli sürülən təkliflərin qəbul edilməsi Milli Məclisin səlahiyyətinə aiddir. Hər yerdə olduğu kimi, Azərbaycanın dövlət suverenliyinin bir ifadəsi də ölkədə qanunların sərbəst şəkildə, daxili milli maraqlara uyğun olaraq, xalqın seçdiyi parlament tərəfindən qəbul edilməsidir. Bunu hamımız qəbul etməliyik. Hələlik qanun layihəsi parlamentə təqdim edilib. Milli Məclis öz sözünü deyəcək. Gözləmək lazımdır”.