Daxili siyasət

Ana səhifə

Daxili siyasət

Müsavat Partiyası və Demokratiya Uğrunda İttifaqa daxil olan partiyalar icazəsiz aksiya keçirməyə cəhd ediblər

12 iyun 2010 14:02 (UTC +04:00)

Bakı. Ramil Məmmədli – APA. Bu gün Müsavat Partiyası və Demokratiya Uğrunda İttifaqa (DUİ) daxil olan partiyalar parlament seçkiləri öncəsi siyasi qüvvələr üçün bərabər şəraitin yaradılması, seçki qanunvericiliyinin dəyişdirilməsi və digər tələblərlə bağlı icazəsiz aksiya keçirməyə cəhd ediblər.

APA-nın məlumatına görə, Yasamal rayonu ərazisində, Milli Elmlər Akademiyasının binası qarşısındakı parkda saat 15:00-a təyin olunan aksiyanın qarşısı polis tərəfindən alınıb.

Aksiya iştirakçılarından bir neçəsi, o cümlədən Müsavat Partiyası Mərkəzi İcra Aparatının sədri Arif Hacılı saxlanılaraq, 26-cı Polis Bölməsinə aparılıb.

Qeyd edək ki, Müsavat və DUİ BŞİH-nə etdiyi müraciətdə aksiya üçün 5 yer təklif edib. Partiya Nərimanov kinoteatrının qarşısındakı meydan, Füzuli meydanı, Bakı şəhər İcra Hakimiyyəti, Prezident Administrasiyası, yaxud Nazirlər Kabinetinin 200 metrlik radiusunda mitinq üçün yer ayrılmasını xahiş edib.

BŞİH isə aksiyanı Binəqədi rayonu Binəqədi qəsəbəsinin İdman-Sağlamlıq Kompleksinin stadionu, Səbail rayonu 20-ci yaşayış sahəsi, Elçin Əzizov küçəsində yerləşən sürücülük məktəbinin həyətindəki meydança və ya Xətai rayonu Zığ yolu küçəsi, 29/22-ci məhəllə ilə üzbəüz meydançada keçirməyi məsləhət görüb.