Daxili siyasət

Ana səhifə

Daxili siyasət

Azərbaycan Milli Məclisi yaz sessiyasının qanunvericilik işləri planını yerinə yetirməyib

29 iyun 2010 10:40 (UTC +04:00)

Bakı. Elbrus Seyfullayev - APA. Azərbaycan Milli Məclisinin yaz sessiyasının qanunvericilik işləri planı yerinə yetirilməyib. APA-nın xəbərinə görə, yaz sessiyasının qanunvericilik işləri planına daxil edilən 22 qanun layihəsinin əksəriyyəti, hətta növbədənkənar sessiya müddətində də müzakirəyə çıxarılmayıb. Yaz sessiyasının qanunvericilik işləri planına daxil edilən və müzakirəyə çıxarılmayan sənədlər, əsasən iqtisadi sahəni əhatə edir. Belə ki, yaz sessiyasının qanunvericilik işləri planına daxil edilən Tikinti Məcəlləsi, Şəhərsalma Məcəlləsi və Rəqabət Məcəlləsinin layihələri müzakirəyə çıxarılmayıb. Sözügedən layihələrə hətta parlamentin İqtisadi siyasət komitəsində baxılmayıb.
Qanunvericilik işləri planına daxil edilən və qəbul edilməyən bir neçə qanun layihəsi isə təhsil sahəsi ilə bağlıdır. Milli Məclisdə “Elm siyasəti haqqında”, “Kəşflərin hüquqi qorunması haqqında”, “Ali təhsil haqqında” qanun layihələrinin yaz sessiya ərzində qəbul ediləcəyi gözlənsə də, onların heç birinin müzakirəsi təşkil edilməyib. Müzakirəyə çıxarılmayan qanun layihələrinin siyahısı bununla bitmir. Yaz sessiyasının iş planına “Həbs yerlərində saxlanılan şübhəli və ya təqsirləndirilən şəxslərin hüquqlarının və azadlıqlarının təmin edilməsi haqqında”, “Kənd təsərrüfatı kooperasiyası haqqında”, “İctimai asayişin təmin edilməsində vətəndaşların iştirakı haqqında” qanun layihələrinin müzakirəsi salınsa da, bu sənədlərin qəbulu baş tutmayıb.
Parlamentin İqtisadi siyasət komitəsinin üzvü Nazim Məmmədov APA-ya açıqlamasında bildirib ki, qanunvericilik işləri planında iqtisadi sahəyə aid olan sənədlərin bir çoxu Azərbaycanın Ümumdünya Ticarət Təşkilatına üzvlüyü istiqamətində qanunvericiliyin təkmilləşdirilməsini nəzərdə tutsa da, bu qanun layihələri müzakirəyə çıxarılmayıb: “Tikinti Məcəlləsi, Şəhərsalma Məcəlləsi və Rəqabət Məcəlləsinin qəbul edilməməsi təəccüb doğurur. Bu sənədlər Azərbaycan üçün çox önəmlidir. Mən özüm də deputat təşəbbüsü ilə iki sənəd təqdim etmişdim. Bunlardan biri “Hesablama Palatası haqqında” qanuna əlavə və dəyişiklik, digər isə “Rieltor fəaliyyəti haqqında” qanun layihəsi idi. Lakin onların da heç birini müzakirəyə çıxarmadılar”.
Məsələyə Milli Məclisdən münasibət öyrənmək mümkün olmayıb.