Daxili siyasət

Ana səhifə

Daxili siyasət

Səfa Mirzəyev: “Eks prezidentlərin statusu haqqında” qanun layihəsi üzərində iş yekunlaşmaq üzrədir”

02 iyul 2010 13:09 (UTC +04:00)

Bakı. Elbrus Seyfullayev - APA. ““Eks prezidentlərin statusu haqqında” qanun layihəsi Prezident Administrasiyasındadır. Hazırda bu sənəd üzərində aparılan iş yekunlaşmaq üzrədir”. APA-nın xəbərinə görə, bu barədə Milli Məclis Aparatının rəhbəri Səfa Mirzəyev parlamentin yaz və növbədənkənar sessiyasının yekunu olaraq keçirilən mətbuat konfransında məlumat verib. Onun sözlərinə görə, sənəd Milli Məclisə daxil olandan sonra müzakirəyə çıxarılacaq. Səfa Mirzəyev qanun layihələri səsə qoyulan zaman parlamentin əməkdaşlarının deputatların əvəzinə səs verməsi ilə bağlı məsələyə də aydınlıq gətirib: “Mən aparatın əməkdaşlarına bunu qadağan etmişəm. Əgər belə hal varsa, ölçü götürə bilərik”.

S. Mirzəyev Milli Məclisin bir neçə sessiyasının gündəliyinə daxil edilən, lakin qəbul olunmayan qanun layihələrinin taleyinə də aydınlıq gətirib. Onun sözlərinə görə, bu sənədlər üzərində iş gedir, dünyanın qabaqcıl ölkələrinin təcrübəsi öyrənilir: “Artıq qərara gəlinib ki, Şəhərsalma və Tikinti Məcəllələri birləşdirilərək vahid sənəd kimi qəbul olunsun”.

Parlamentin sədr müavini Bahar Muradova isə siyasi partiyaların dövlət tərəfindən maliyyələşdirilməsi ilə bağlı məsələyə münasibət açıqlayıb: “Bu məsələ yalnız növbəti seçkilərdən sonra gündəmə gələ bilər. Siyasi partiyaların maliyyələşdirilməsi ilə bağlı kriterilər müəyyənləşdirilməlidir”.

B. Muradova Azərbaycanın mərhum prezidenti Əbülfəz Elçibəyin ailə üzvlərinin ölkəni tərk etmək istəyi ilə bağlı yayılan məlumatlara da münasibət bildirib: “Elçibəyin həm qəbirüstü abidəsinin götürülməsi, həm də ailə üzvlərinin təminatı ilə bağlı hökumət tərəfindən bir çox təkliflər olub. Lakin onlar bu təklifləri qəbul etməyiblər. Təbii ki, onların ölkəni tərk etməsi yaxşı olmazdı. Ancaq bu adamlar özlərini başqa yerdə görürlərsə, bu, ayrı məsələdir”.

Vitse-spiker, həmçinin yaxın günlərdə parlament nümayəndə heyətinin ATƏT Parlament Assambleyasının növbəti sessiyasında iştirak edəcəklərini və orada bir sıra məsələləri müzakirəyə çıxaracaqlarını bildirib: “Hər şeydən əvvəl biz Dağlıq Qarabağ münaqişəsi ilə bağlı mövcud vəziyyətə münasibət bildirəcəyik. Eyni zamanda, bir neçə gün əvvəl cəbhə xəttində Ermənistan Silahlı Qüvvələri tərəfindən öldürülən və meyitinin götürülməsi mümkün olmayan Azərbaycan əsgərinin cəsədinin qaytarılması məsələsini də gündəmə gətirəcəyik”.

Mətbuat konfransında iştirak edən Azərbaycanın Avropa Şurasının Parlament Assambleyasındakı nümayəndə heyətinin rəhbəri Səməd Seyidov qurumun son sessiyasında Azərbaycanla bağlı qəbul olunan qətnaməyə münasibətini açıqlayıb. Onun sözlərinə görə, AŞ PA-nın Azərbaycanla bağlı qəbul etdiyi qətnamələrdə obyektliklə yanaşı bəzi qərəzli məqamlar da var: “Hazırda bu qətnamə təhlil olunur, diqqətlə öyrənilir, obyektiv tənqidlər nəzərə alınır”.