Daxili siyasət

Ana səhifə

Daxili siyasət

Elmira Süleymanova azərbaycanlı hərbi qulluqçunun cəsədinin qaytarılması ilə bağlı Beynəlxalq Qırmızı Xaç Komitəsinin prezidentinə müraciət edib

06 iyul 2010 15:24 (UTC +04:00)

Bu barədə APA-ya Ombudsman Aparatının mətbuat xidmətindən məlumat verilib.

Elmira Süleymanova müraciətində bildirib ki, Ermənistanın Azərbaycana qarşı təcavüzü nəticəsində minlərlə Azərbaycan vətəndaşı əsir və girov götürülüb, itkin düşüb ki, onların əksəriyyətinin yeri hələ də məlum deyil: “Bütün bunlar beynəlxalq humanitar hüquq normalarının, o cümlədən beynəlxalq humanitar hüququn bir hissəsi olan Müharibə qurbanlarının müdafiəsinə dair 1949-cu il tarixli Cenevrə Konvensiyalarının pozulmasıdır. 1994-cü ildən atəşkəs haqqında razılıq əldə olunmasına baxmayaraq, Ermənistan tərəfi mütəmadi olaraq atəşkəs rejimini pozur, bu da öz növbəsində Azərbaycan tərəfindən insan itkiləri ilə nəticələnir. Belə hallar ATƏT nümayəndələrinin keçirdikləri monitorinq zamanı da müşahidə olunub. Bundan başqa, atəşkəs rejimi dövründə Ermənistan tərəfindən cəbhə xətti boyunca yaşayan dinc sakinlərin girov götürülməsi, onların sayının gizlədilməsi, azərbaycanlı mülki əhaliyə maddi ziyan vurulması (atəşə tutma, yaşayış binalarının, kənd təsərrüfatı texnikalarının dağıdılması və s.) kimi pozuntulara yol verilir.
Son dövrlər isə cəbhə xəttində erməni hərbçiləri tərəfindən qətlə yetirilən Azərbaycan Silahlı Qüvvələri hərbi qulluqçularının cəsədlərinin vaxtında verilməməsi cəmiyyətdə böyük narazılıq və narahatlıq doğurur”.

Elmira Süleymanova müraciətində qeyd edib ki, Azərbaycan Silahlı Qüvvələrinin hərbi qulluqçusu Mübariz Ağakərim oğlu İbrahimov cəbhənin Tərtər rayonu istiqamətində Ermənistan Silahlı Qüvvələrinin hücumunu dəf edərkən qətlə yetirilib, lakin hələ də onun cəsədi Azərbaycan tərəfinə verilməyib. Bu isə onun ailə üzvlərinin ağır psixoloji sarsıntıya məruz qalmasına səbəb olub: “Mandatınız çərçivəsində, beynəlxalq hüquq normalarına uyğun olaraq, Azərbaycan Silahlı Qüvvələrinin hərbi qulluqçusu Mübariz İbrahimovun cəsədinin mümkün qədər qısa müddət ərzində Azərbaycan tərəfinə qaytarılmasında yardımçı olmağınızı Sizdən xahiş edirəm”.