Daxili siyasət

Ana səhifə

Daxili siyasət

Yusif Bağırzadə: “Sədr seçilməyim dörd ay müddətində partiyada göstərdiyim fəaliyyətin nəticəsidir”

12 iyul 2010 11:32 (UTC +04:00)

Y. Bağırzadə APA-ya açıqlamasında aparılacaq islahatların detallarını söyləməyib. O bildirib ki, indiki halda partiya üçün prioritet fəaliyyət istiqaməti parlament seçkiləridir.

Yeni sədr bəyan edib ki, onların qarşısında dayanan əsas məqsəd AMİP-i parlament partiyasına çevirməkdir. Həmçinin partiyanın fəaliyyətini gücləndirmək, gənclər və qadınlar təşkilatlarını aktivləşdirmək nəzərdə tutulur. Y. Bağırzadə AMİP-in seçki bloklarında təmsil olunmayacağını da vurğulayıb: “Biz partiyaların əməkdaşlığının tərəfdarıyıq. Digər partiyalarla əməkdaşlıq olacaq, amma seçki bloklarına və ittifaqlara qoşulmaq fikrində deyilik. AMİP seçkilərə müstəqil şəkildə gedəcək. Seçki blokunun yaradılması üçün vaxt çox azdır. Bloklar seçkilərdən ən azı bir il, 10 ay əvvəl yaradılmalıdır. Onun konturları müəyyən olunmalı, ictimai fikir yaradılmalıdır. İndi çox gecdir. Həm də son vaxtlar müxalifət partiyaları arasındakı xoşagəlməz münasibətləri də nəzərə alaraq belə bir addım atmaqda maraqlı deyilik”.

Y. Bağırzadə deyib ki, AMİP digər müxalifət partiyalarının birgə tədbirlərində iştirak edəcək və bəzi seçki dairələrində müəyyən namizədlərin birgə müdafiə olunması məsələsində də maraqlıdır: “Biz nüfuzlu şəxslərə, namizədlərə dəstək verəcəyik və həmin dəstəyi də qarşı tərəfdən istəyəcəyik”.

“AMİP-ə sədr gəlməyinizlə bağlı hansı müzakirələr olmuşdu və hansı şərtlərlə AMİP sədri oldunuz” sualına cavab verən Y. Bağırzadə əvvəlcədən heç bir müzakirənin aparılmadığını qeyd edib: “Mənim 1995-ci ildən AMİP rəhbərliyi ilə münasibətim var idi. 1998-ci ildə ADP-yə üzv olanda AMİP-lə bağlı müsbət fikirlərimi demişəm. Sədr seçilməyim 4 ay müddətində partiyada göstərdiyim fəaliyyət nəticəsində olub. Mən hələ partiyaya adi üzv gələndə artıq bu barədə söz-söhbət yaranmışdı. Öz işimi ortaya qoydum və nailiyyət əldə olundu”.

Yusif_AMİP