Daxili siyasət

Ana səhifə

Daxili siyasət

AXCP Müsavat Partiyası ilə seçki bloku yaratmaq üçün danışıqlara başlamaq barədə qərar qəbul edib

13 iyul 2010 09:34 (UTC +04:00)

Bakı. Elnur Məmmədli – APA. Azərbaycan Xalq Cəbhəsi Partiyasının (AXCP) Rəyasət Heyəti parlament seçkilərində əməkdaşlıq etmək üçün Müsavat Partiyası ilə danışıqlar aparmaq barədə qərar qəbul edib. Bu barədə APA-ya AXCP sədrinin müavini Nurəddin Məmmədli məlumat verib.

Onun özlərinə görə, bu qərar bir həftə əvvəl qəbul edilib və hazırda tərəflər arasında danışıqlar aparılır. N. Məmmədli hesab edir ki, seçkilərlə bağlı adıçəkilən partiyaların blok şəklində fəaliyyət göstərməsi mümkündür: “Bu əsas iki məqsədə xidmət etməlidir. Birincisi, namizədlərimizin vahid siyahı əsasında formalaşması, ikincisi isə seçkilər öncəsi mərhələdə əməkdaşlıq imkanlarını birləşdirib genişləndirmək. Bu istiqamətdə danışıqlar davam edir və mənə elə gəlir ki, yaxın günlərdə bu barədə cəmiyyətə ictimaiyyətə açıqlama vermək mümkün olacaq”.

N. Məmmədli danışıqların AXCP-Müsavat arasında aparıldığını və bunun “Azadlıq” blokuna aidiyyatının olmadığını qeyd edib: “Bu, blokdakı digər partiyaların maraqlarına toxunan məsələ deyil. Yəni ALP-də, VİP də vahid namizəd siyahısı əsasında seçkilərə getməyin tərəfdarıdır. Söhbət siyasi blokdan yox, seçki blokundan gedir və burada digər müttəfiqlərimizin maraqlarına toxunacaq bir şey yoxdur. Əgər “Azadlıq” bloku qalarsa, o zaman blokdakı digər partiyalar da bu prosesdə nəzərə alınacaqlar. Söhbət siyasi blokdan gedirsə, biz bir siyasi blok kimi öz fəaliyyətimizi uzlaşdırmaq şərti ilə davam etdirə bilərik. Bunun seçki blokuna heç bir aidiyyatı yoxdur. Əgər danışıqlar ciddi görkəm alsa, razılıqlar olsa, AXCP ilə Müsavat arasında seçki bloku yaratmaq olar. Bu daha səmərəli bir variantdır. AXCP də belə bir əməkdaşlığın tərəfdarıdır”.

Müsavat Partiyası Mərkəzi İcra Aparatının rəhbəri Arif Hacılı isə APA-ya açıqlamasında bildirib ki, AXCP tərəfindən addımların atılması zəruridir: “Müsavat Partiyası belə birliyin olması istəyini çoxdan bəyan edib. Demokratiya Uğrunda İttifaq da belə birliyə kifayət qədər loyal yanaşır. Bu işlərin reallaşması üçün konkret müzakirələr yoxdur”. A. Hacılı bununla bağlı detallı açıqlamaların verilməsinin prosesin ziyanına ola biləcəyini ehtimal edərək ətraflı danışmaq istəmədiyini deyib.