Daxili siyasət

Ana səhifə

Daxili siyasət

Mirmahmud Mirəlioğlu: “İsa Qəmbərin təklifində bizim üçün tam aydın olmayan məsələlər var”

20 iyul 2010 11:17 (UTC +04:00)

Bakı. Elnur Məmmədli – APA. Demokratiya Uğrunda İttifaqın (DUİ) parlament seçkilərində birgə iştirakla bağlı AXCP-Müsavat Partiyası arasında aparılan danışıqlarda iştirakı ertələnib. Klassik Xalq Cəbhəsi Partiyasının (KXCP) sədri Mirmahmud Mirəlioğlu APA-ya bildirib ki, indiki mərhələdə hansı məsələlər razılaşdırılırsa, o reallaşır: “Hələlik AXCP ilə Müsavat arasında intensiv danışıqlar baş tutmayıb. Bu baş tutsun, konkretləşsin, nəticələnsin, sənədləşsin və sonra ardı da olacaq”. AXCP rəhbərliyinin yaranacaq birlikdə KXCP-nin iştirakını arzu etməməsi barədə mətbuatda səslənən fikirlərə münasibət bildirən M. Mirəlioğlu bildirib ki, hazırda proses gedir, prosesdə bir dəfə razılaşdırılmayan məsələ növbəti dəfə razılaşdırıla bilər: “Bu məsələyə mənim konkret münasibətim belədir ki, bu məsələdə biz mümkün olanı əldə edəcəyik. Mətbuatda yazılanlara gəldikdə, atalar deyir ki, od olmasa, tüstü çıxmaz”.

KXCP-nin də Müsavat və AXCP ilə vahid partiyada birləşmək ehtimalı barədə sualı cavablandıran M. Mirəlioğlu bildirib ki, nəzəri baxımdan bu mümkündür: “Bu təklifi müxtəlif cür yozurlar və deyirlər bu bütövlükdə Rəsulzadə - Elçibəy yolunda olanlardan yox, AXCP və KXCP-yə ünvanlanmış bir məsələdir. Ayrı bir qəzet yazır ki, xeyir bu yalnız AXCP və Müsavat məsələsidir. Həmin təklifdə bizim üçün tam aydın olmayan məsələlər var. “AXCP və Müsavat bir partiya kimi olsun, yoxsa Müsavat və cəbhələr birləşsin” kimi məsələlərə aydınlıq gətirilməlidir. Bu da birbaşa İsa Qəmbərin səlahiyyətində olan məsələdir və bu suallara o aydınlıq gətirə bilər”.

M. Mirəlioğlu onu da bildirib ki, bundan əvvəl Müsavat və DUİ birgə aksiyalar keçirib və bu aksiyalar təyin edilərkən məsələ koordinasiya olunub: “Amma iyulun 31-nə təyin edilmiş aksiya ilə bağlı nə DUİ-də, nə də KXCP İdarə Heyətində müzakirə aparılmayıb. Dostlarımız da bu barədə bizə məlumat verməyib. Ona görə də hələlik bu məsələ açıq qalır”.