Daxili siyasət

Ana səhifə

Daxili siyasət

Bahar Muradova Milli Demokratiya İnstitutunun nümayəndə heyəti ilə görüşüb

22 iyul 2010 11:06 (UTC +04:00)

Bakı. Elnur Məmmədli – APA. Milli Məclis sədrinin müavini Bahar Muradova ABŞ Milli Demokratiya İnstitutunun Avrasiya proqramları üzrə direktoru Laura Cuitin rəhbərlik etdiyi nümayəndə heyəti ilə görüş keçirib. Parlamentin mətbuat xidmətindən APA-ya daxil olan məlumata görə, görüşdə Azərbaycan - ABŞ münasibətlərini yüksək qiymətləndirən B. Muradova ölkələr arasındakı əlaqələri genişləndirmək üçün daha yaxşı imkanların, potensialın və hər iki dövlətin siyasi iradəsinin mövcud olduğunu qeyd edib. Belə səfərlərin, aparılan müzakirələrin xüsusi əhəmiyyətini vurğulayan sədr müavini MDİ ilə əməkdaşlıqdan razılığını bildirib. ABŞ-ın dövlət katibi Hillari Klintonun bu yaxınlarda Azərbaycana səfərini xatırladan B. Muradova bu səfərin iki ölkə arasındakı vacib məsələlərin həllində böyük rolunun olduğunu qeyd edib.

Laura Cuit isə son 15 ildə Azərbaycanda baş verən müsbət dəyişikliklərin müşahidə olunduğunu bildirib. Azərbaycana səfərinin məqsədindən danışan MDİ nümayəndəsi səfər müddətində müvafiq dövlət strukturları, qeyri-hökumət təşkilatları və siyasi qurumlarla müxtəlif görüşlər keçirəcəyini, institut tərəfindən hazırlanan və 2010-cu ildə reallaşdırılması nəzərdə tutulan proqramlara dair fikir mübadiləsi aparılacağını qeyd edib.