Daxili siyasət

Ana səhifə

Daxili siyasət

Nurəddin Məmmədli: “İnanıram ki, Xaliq Bahadırın emosional püskürməsi sona yetəcək və proseslər qaydasında davam edəcək”

30 iyul 2010 14:06 (UTC +04:00)

Mən şəxsən inanıram ki, Xaliq Bahadırla bağlı məsələlər bu həddə çatmayacaq. Xaliq Bahadırın emosional püskürməsi sona yetəcək və proseslər qaydasında davam edəcək”. Bunu APA-ya açıqlamasında Azərbaycan Xalq Cəbhəsi Partiyasının (AXCP) sədr müavini Nurəddin Məmmədli deyib. AXCP Rəyasət Heyətinin üzvü Xaliq Bahadırın AXCP-Müsavat birliyi ilə bağlı ittihamlarına münasibət bildirən sədr müavini deyib ki, uzun müddətdir X. Bahadır Rəyasət Heyətinin iclaslarında iştirak etmir: “Mən onunla yaxın ünsiyyətdəyəm və ona bildirdim ki, kənarda durub, dedi-qodularla qərarların qəbul olunmasına təsir etmək mümkün deyil. Partiyada müvafiq strukturlar var, iştirak edib mövqeyini bildirsin”.

N. Məmmədli deyib ki, X. Bahadırın ona təzyiq göstərilməsi, böhtan atılması ilə bağlı dedikləri həqiqətə uyğun deyil: “O, bütün hallarda öz dediklərinin reallaşmasını istəyən bir adamdır. Hətta mənə deyir ki, bu məsələdə niyə onu müdafiə etmirəm. Ona izah və sübut etmişəm ki, haqlı deyil, buna görə də onu müdafiə etmək düzgün olmaz. Xaliq Bahadırın birliyə qarşı çıxması tamamilə anlaşılmaz yanaşmadır. Deyir ki, birləşmə ilə bağlı partiyada müzakirə aparılmayıb. Halbuki mənim iştirak etdiyim Rəyasət Heyətində bu məsələ ən azı 5 saat müzakirə edilib. Burada Xaliq Bahadırdan daha ciddi müqavimət göstərən insanlar olub. Amma sonda qərara alınıb ki, bu sosial sifarişdir və bütün çətinliklərə baxmayaraq bu sınaqdan keçməliyik. Yəni bu, bir testdir. Kənarda dayanıb “bu məsələ partiyada müzakirə aparılmayıb” demək obyektivlikdən kənardır, yalandır. Bu müzakirə olub və mən orada iştirak etmişəm. Ona görə də Xaliq Bahadırın dedikləri yanlışdır”.

N. Məmmədli bildirib ki, AXCP Müsavatla danışıqlara qərar verib, lakin hələlik ortada heç nə yoxdur: “Əgər birləşmək olacaqsa, bu, Nizamnaməyə uyğun olaraq qurultayda müzakirə ediləcək, sonra isə birləşdirici qurultay olacaq. Mən AXCP-də olduğum müddətdə daim aşağıdan təzyiqlər görmüşəm ki, Müsavatla niyə birləşmirsiniz? Xüsusilə rayonlarda bu iki partiya vahid şəkildə fəaliyyət göstərir”.

X. Bahadırın AXCP-də birləşmənin əleyhinə olan şəxslərin olması barədə fikirlərinə gəldikdə, N. Məmmədli deyib ki, müəyyən adamlar birləşmənin əleyhinə ola bilərlər: “Amma burada ictimai motivlər tapmaq mümkün deyil. Sadəcə şəxsi münasibətlərdən doğan təpgilər ola bilər və bu, istisna deyil. Amma şəxsən mənə bu birləşməyə qarşı olan adamlar rast gəlməyib. Düzdür, narahatlıq ifadə edən, bunun bir söz oyunu olduğunu deyənlər var. Amma bunun əleyhinə olanlar nə partiya rəhbərliyində, nə də rayon təşkilatlarının fəalları içərisində var”.

AXCP_Müsavat