Daxili siyasət

Ana səhifə

Daxili siyasət

Arif Hacılı: “Təəssüf ki, AXCP heç bir halda DUİ-dən olan namizədin müdafiəsini mümkün saymır”

09 avqust 2010 17:06 (UTC +04:00)

Bakı. Pərvin Abbasov – APA. “Biz Azərbaycan Xalq Cəbhəsi Partiyası ilə seçki bloku yaratmaqda maraqlıyıq və bunun üçün əlimizdən gələni etməyə, həmçinin güzəştlərə hazırıq». Bunu APA-ya açıqlamasında Müsavat Partiyası Mərkəzi İcra Aparatının rəhbəri Arif Hacılı deyib. Onun sözlərinə görə, güzəşt məsələsində söhbət dairələrin sayından deyil, konkret dairələrdən gedir: “Həm AXCP, həm də Müsavat üçün vacib olan dairələr və namizədlər var. Eyni zamanda, biz uzun aylar ərzində Demokratiya Uğrunda İttifaqa daxil olan partiyalarla müzakirələr aparmışıq, onlarla müəyyən razılaşmalar əldə etmişik. İndi isə bizim həmin razılaşmaların üzərindən xətt çəkməyimiz siyasi baxımdan düzgün olmazdı. Bununla belə, çalışacağıq Müsavatın güzəşti hesabına olsa belə, AXCP ilə seçki blokunun yaradılması üçün bütün şanslardan istifadə edək”.

A. Hacılı təəssüflə deyib ki, AXCP heç bir halda DUİ-dən olan hər hansı bir namizədin müdafiə olunmasını özü üçün qeyri-mümkün sayır: «Ancaq hesab etmirəm ki, bu, həll olunmayan problemdir. Bu problemin həlli üçün əlimizdən gələni edəcəyik».

Müsavat funksioneri onu da bildirib ki, partiya Divanının bu gün keçirilən toplantısında yaxın 10 gün müddətində hansısa kütləvi aksiyanın keçirilməsi barədə qərar qəbul edilməyib: “Yəqin ki, biz DUİ və AXCP ilə məsləhətləşmələrdən sonra bu haqda qərar verəcəyik. İstisna deyil ki, növbəti kütləvi aksiyamız avqustun sonu, sentyabrın əvvəlinə təyin edilsin”.

AXCP_Müsavat