Daxili siyasət

Ana səhifə

Daxili siyasət

Prezident İlham Əliyev: “Dağlıq Qarabağ danışıqlarında Azərbaycanın mövqeləri güclənir”

10 avqust 2010 20:35 (UTC +04:00)

APA-nın məlumatına görə, bunu Azərbaycan prezidenti İlham Əliyev Dövlət Sərhəd Xidməti Akademiyasının açılış mərasimində çıxışında deyib. Prezident bildirib ki, sərhədlərimizin qorunması təhlükəsizliyimizin təmin edilməsi deməkdir: “Təhlükəsizliyimizin təmin edilməsi üçün bütün tədbirlər görülür. Biz sərhədlərimizi gücləndirməliyik və buna nail olmuşuq. Bu gün həm texniki vasitələr, həm mühəndis qurğuları, həm də avadanlıq baxımından Sərhəd Xidmətimiz ən yüksək səviyyədədir. Sərhəd Xidmətinin maddi-texniki bazasının yaxşılaşdırılması və möhkəmləndirilməsi üçün mütəmadi qaydada ardıcıl tədbirlər görülür, avadanlıq, silah-sursat, texnika alınır və təchizat baxımından bizdə heç bir problem yoxdur. Lazımi səviyyədə maliyyə vəsaiti də ayrılır ki, bütün işlər yüksək səviyyədə görülsün”.

Dövlət başçısı vurğulayıb ki, ayrılan maliyyə vəsaitindən çox səmərəli istifadə olunur. Sərhədçilər, onların yaşayış səviyyəsinin yaxşılaşdırılması üçün əməli işlər görülür, evlər tikilir, istirahət mərkəzləri, idman qurğuları yaradılır: “Azərbaycan Dövlət Sərhəd Xidməti bu gün dünya miqyasında öz layiqli yerini tuta bilib və Azərbaycanın sərhədlərinin qorunması işində böyük nailiyyətlərə nail olub".

Prezident bildirib ki, gələcəkdə də bu məsələ daim diqqət mərkəzində olacaq: “Azərbaycan sərhədlərinin lazımi səviyyədə qorunması üçün gələcəkdə də əlavə vəsait ayrılacaq, yeni texniki imkanlar da əldə olunacaq. Bütövlükdə Sərhəd Xidmətinin müasir quruma çevrilməsi istiqamətində çox böyük işlər görülüb. Bu gün Sərhəd Qoşunları çox güclü və çevik hərbi birləşmədir. Sərhəd Xidmətinin qarşısında qoyulan vəzifələrdən biri də məhz ondan ibarətdir ki, Sərhəd Qoşunlarının döyüş qabiliyyəti artırılsın. Bu məqsədlər üçün silah-sursat, texnikanın alınması prosesi davam edir və deyə bilərəm ki, Sərhəd Qoşunları istənilən anda Azərbaycanın ərazi bütövlüyünün bərpası üçün ordumuzla bərabər hərəkət etməyə hazırdır. Artıq iki ildir ki, ardıcıl şəkildə keçirilmiş hərbi təlimlər və Sərhəd Qoşunlarının bu təlimlərdə fəal iştirakı bunun bariz nümunəsidir”.

Prezident deyib ki, Azərbaycan öz ərazi bütövlüyünü bərpa edəcək. Bunu etmək üçün bütün hərbi qurumlar vahid komanda altında birləşib və Ali Baş Komandanın əmrləri ilə hərəkət edir: “Lazım gələn anda bütün hərbi qurumlar bir yumruq kimi hərəkət edəcək, Azərbaycanın ərazi bütövlüyünü bərpa edəcək. Bunu etmək üçün güclü iqtisadiyyat və güclü hərbi potensial lazımdır. Azərbaycan həm güclü iqtisadi potensiala, həm də hərbi potensiala malik olan ölkədir”.

Dövlət başçısı Azərbaycanın gündən-günə gücləndiyini qeyd edib: “Maliyyə imkanlarımız, hərbi xərclərimiz artır, hərbi xərclərimiz dövlət büdcəsində ən birinci yerdədir. Bu, belə də olmalıdır, çünki biz müharibə şəraitində yaşayırıq. Müharibə hələ bitməyib. Müharibənin birinci mərhələsi başa çatıb, atəşkəs razılaşması var. Ancaq müharibə davam edir. Biz hər an hazır olmalıyıq və hazırıq ki, öz torpaqlarımızı işğalçılardan azad edək”.

Prezident bildirib ki, Azərbaycanın hərbi potensialının gücləndirilməsi üçün bütün səylər səfərbər olunub: “Bütün maliyyə resurslarını cəmləşdirmişik ki, torpaqlarımızı işğalçılardan azad edək. Bu gün Azərbaycan Ordusu, Azərbaycanın hərbi potensialı buna imkan verir. Sadəcə olaraq, biz istəyirik ki, məsələ dinc yolla, danışıqlar yolu ilə həll olunsun. Danışıqlarda Azərbaycanın mövqeləri güclənir. Azərbaycanın danışıqlarda konstruktiv mövqeyi artıq reallıqdır. Qarşı tərəf isə vaxt uzatmaqla məşğul olmağa və sadəcə olaraq, danışıqları pozmağa çalışır. Ancaq danışıqlar pozularsa, o zaman yeni vəziyyət yaranacaq və məsələnin hərbi yolla həlli məsələsi gündəliyə salınacaq”.

Prezident deyib ki, Azərbaycanın böyük və gözəl gələcəyi var: “Bu gün ölkə sözün əsl mənasında intibah dövrünü yaşayır. Bütün sahələrdə quruculuq, abadlıq işləri, sürətli inkişaf təmin olunur. Bütün regionlarda işlər sürətlə gedir. Bakı gözəlləşir, abadlaşır. Bizim maliyyə imkanlarımız artır. Uğurlu neft siyasətimiz, regionların inkişafı, bir sözlə, Azərbaycanın uğurlu yüksəlişi və bundan sonrakı illərdə dayanıqlı inkişafı artıq reallıqdır. Biz ölkəmizi, müstəqil siyasətimizi qorumalıyıq. Azərbaycan müstəqil ölkə kimi böyük nailiyyətlərə çatıb. Müstəqil ölkə kimi müstəqil siyasət aparırıq. Azərbaycan xalqının maraqları müdafiə edilir. Azərbaycan dünya miqyasında böyük hörmətə malik olan bir ölkə, etibarlı tərəfdaşdır və regionda gedən proseslərdə fəal rol oynayır”.

Dövlət başçısı ölkəmizin təhlükəsizliyinin qorunmasında Sərhəd Xidmətinin çox böyük rolu olduğunu vurğulayıb: “Sərhədlərimiz dostlarımızın üzünə açıqdır. Ancaq Azərbaycana pis niyyətlə gəlmək istəyənlər buna nail ola bilməyəcəklər”.