Daxili siyasət

Ana səhifə

Daxili siyasət

AXCP Rəyasət Heyətinin iclası keçirilib, Xaliq Bahadır toplantıya qatılmayıb

12 avqust 2010 07:40 (UTC +04:00)

Bakı. Pərvin Abbasov – APA. Azərbaycan Xalq Cəbhəsi Partiyası (AXCP) Rəyasət Heyətinin iclası keçirilib. Bu barədə APA-ya AXCP sədrinin müavini Nurəddin Məmmədli məlumat verib.

Onun sözlərinə görə, iclasda, əsasən AXCP üçün vacib olan iki əsas məsələ müzakirə edilib.

Rəyasət Heyəti əvvəlcə seçkiyə hazırlıq məsələsini müzakirə edib, seçki ilə bağlı bütün qruplar formalaşdırılıb, qruplara daxil olan şəxslər, onların vəzifələri, qrupların rəhbərləri müəyyənləşdirilib. Dairələr üzrə seçki qərargahlarının, həmçinin mərkəzi qərargahın yaradılması ilə bağlı müvafiq təlimatlar təsdiqlənib. Artıq avqustun 12-dən başlayaraq AXCP-nin seçki kampaniyasını təşkil edəcək bütün strukturların fəaliyyətinə start verilir.

İclasda daha sonra AXCP-nin Müsavat Partiyası ilə əməkdaşlıq məsələsi müzakirə olunub. Əvvəlcə partiya sədri Əli Kərimlinin Müsavatla əməkdaşlıqla bağlı qısa məlumatı dinlənilib, bu istiqamətdə danışıqların davam etdirilməsi, AXCP-dən asılı olan bütün addımların atılması ilə bağlı müvafiq qərar qəbul olunub.

Rəyasət Heyətinin üzvü Xaliq Bahadır iclasda iştirak etməyib. Bununla yanaşı, N. Məmmədli X. Bahadırın seçki ilə bağlı yaradılmış və özünün rəhbərlik edəcəyi təbliğat, təşviqat və mətbuat məsələləri üzrə qrupda təmsil olunacağını bildirib: “Bu gün onunla danışaraq vəzifəsinin başına keçməsini xahiş edəcəyəm”.

N. Məmmədlinin sözlərinə görə, iclasda Demokratiya Uğrunda İttifaq (DUİ) məsələsi müzakirə olunmayıb: «Bu, Müsavata aid olan məsələdir. Biz seçki bloku yaratmaq istiqamətində yalnız Müsavat Partiyası ilə əməkdaşlıq etmək fikrindəyik».

Qeyd edək ki, AXCP-Müsavat əməkdaşlığı, bu partiyaların birləşdirilməsi məsələsində Rəyasət Heyətinin üzvü Xalq Bahadırla partiya rəhbərliyi arasında fikir ayrılığı yaranıb. X. Bahadır mətbuata açıqlamasında qurumun növbəti iclasında iştirak edərək son vaxtlar partiya rəhbərliyi ilə arasında olan fikir ayrılığını aydınlaşdıracağını açıqlamışdı.

Xaliq Bahadır isə APA-ya açıqlamasında Rəyasət Heyətinin iclasında toplantıya çağırılmadığı üçün iştirak etmədiyini bildirib: “İclasa çağırılmamışam, qrupa salınmağımla bağlı da mənə heç kim heç nə deməyib”.

AXCP_Müsavat