Daxili siyasət

Ana səhifə

Daxili siyasət

AXCP sədrinin müavini: “Müsavatda nə baş verdiyi haqda kifayət qədər məlumatlı olsam da, bu barədə danışmaq istəmirəm”

12 avqust 2010 10:21 (UTC +04:00)

Bunu APA-ya açıqlamasında Müsavat Partiyası Mərkəzi İcra Aparatının rəhbəri Arif Hacılı deyib. O bildirib ki, qeyd olunan məqamlar əlavə nüanslar yaradır: “İstənilən halda biz çalışacağıq ki, bu il keçiriləcək seçkidə ilk növbədə AXCP ilə, eyni zamanda demokratik düşərgəyə aid olan digər partiyalarla sıx əməkdaşlıq edək, müttəfiqlik münasibətləri quraq. Bundan başqa, biz ayrı-ayrı ictimai təşkilat nümayəndələrinin, ziyalıların, demokratik düşərgəyə aid müstəqil şəxslərin müdafiəsi məsələsini də müzakirə edəcəyik”.

A. Hacılı demokratik düşərgəyə aid olan qüvvələrin əməkdaşlığı məsələsi barədə isə deyib ki, söhbət heç də vaxtilə mövcud olmuş Demokratik Konqresin bərpasından deyil, siyasi qüvvələrin daha çox inteqrasiya olunduğu blokdan gedir: “Sadəcə, “Demkonqres” sözü ona görə işlədilir ki, indiyədək Azərbaycan demokratik qüvvələrinin ən çox inteqrasiya etdiyi, hətta konfedrativ birliyi xatırladan birliyi məhz “Demkonqres” olub. Bu, tamamilə şərtidir, söhbət heç də addan getmir. Hesab edirəm ki, Azərbaycan demokratik müxalifətinin daha sıx əməkdaşlığına, daha ciddi müttəfiqliyinə şərait yaradan bir blokun yaradılması mümkün ola bilər. Ancaq bunlar seçkiöncəsi yox, seçkidən sonrakı dövrə aiddir”.

A. Hacılı AXCP sədrinin müavini Nurəddin Məmmədlinin onun “Demkonqres”ə bənzər birliyin yaradılması barədə fikirlərinə münasibət bildirməsinə də toxunub: “Görünür, mənim fikirlərim bəzi adamlar tərəfindən düzgün başa düşülməyib. İstənilən halda mən hesab edirəm ki, müttəfiqliyə can atan siyasi qüvvələr öz davranışlarında təmkinli və korrekt olmağa çalışmalıdırlar”.

AXCP sədrinin müavini Nurəddin Məmmədli isə APA-ya açıqlamasında yeni “Demkonqres” yaradılması ideyası barədə danışarkən kifayət qədər korrekt və intizamlı davranış nümayiş etdirdiyini söyləyib: “Demişəm ki, birləşmək istəyində olan partiyalar hər şeyi ictimaiyyət üçün açıqlamamalı, danışıqlar iki partiya haqqında getməli, nəticələr haqqında cəmiyyətə qərarlar, razılaşmalar səviyyəsində məlumat verilməlidir. Mən öz şəxsi fikrimi ifadə etmişəm. Arif Hacılı “Demkonqres” variantı təklif edir, mən də demişəm ki, bu, birliyə xidmət etmir. O deyir bu, birlik modelidir, mən düşünürəm ki, bu, vaxtı keçmiş bir ideyadır. Qaldı digər məsələlərə, biz Müsavatla istənilən səviyyədə diskussiyalar aparıb, həqiqəti ortaya qoyub razılaşmaya meylli olduğumuzu, razılaşma uğrunda mübarizə apardığımızı sübut etməyə hazırıq”.

N. Məmmədli deyib ki, təmsil olunduğu partiyada AXCP-Müsavat birliyinə qarşı olan bircə nəfər var, o isə fikrini açıq şəkildə ifadə etmiş Xaliq Bahadırdır: “AXCP-də başqa elə bir adam tanımıram ki, bu birliyin əleyhinə olsun. Ancaq Müsavatda nə baş verdiyi haqda kifayət qədər məlumatlı olsam da, bayaq dediyim ideyalara sədaqət nümayiş etdirərək bu barədə danışmaq istəmirəm”.

AXCP_Müsavat