Daxili siyasət

Ana səhifə

Daxili siyasət

AXCP qurultay keçirmək üçün Bakının mədəniyyət saraylarına müraciət edəcək

13 avqust 2010 10:27 (UTC +04:00)

Bakı. Pərvin Abbasov – APA. “Biz Bakı şəhər İcra Hakimiyyətinin cavabına uyğun olaraq gələn həftə paytaxt ərazisində yerləşən mədəniyyət saraylarından birinə müraciət edəcəyik. Təklif edəcəyik ki, qurultay keçirmək üçün bizimlə icarə müqavilə bağlansın”. Bunu APA-ya açıqlamasında AXCP sədrinin müavini Fuad Qəhrəmanlı deyib.

F. Qəhrəmanlı AXCP rəhbərliyində narahatlıq olduğunu da açıqlayıb: “Hakimiyyətin müvafiq strukturları bizim müraciət edəcəyimiz mədəniyyət sarayının rəhbərliyinə təzyiq göstərə və qurultay üçün yer ayrılmaya bilər. Çünki bizim bu günə qədər kütləvi aksiyalarla bağlı müraciətlərimizə hakimiyyət strukturları tərəfindən analoji imtina cavabları verilib. İndi də müxtəlif bəhanələrlə qurultayın keçirilməsi üçün yerlə təmin olunmağımıza maneçilik törədilə bilər. Ancaq biz bütün hallarda qurultayın keçirilməsinə çalışacağıq. Yer tapana qədər zal olan bütün yerlərlə danışıqlar aparacağıq. Əgər bütün yerlərdən eyni imtina cavabı alınarsa, məhkəməyə müraciət edəcəyik. Həmçinin, partiya rəhbərliyi məsələni müzakirə edərək müvafiq addımların atılması üçün qərarlar verəcək”.

F. Qəhrəmanlı avqustun 21-dək yer tapa bilməyəcəkləri təqdirdə qurultayın vaxtının dəyişdirilə biləcəyini də istisna etməyib.

Qeyd edək ki, AXCP növbəti V (VIII) qurultayını keçirmək üçün iyulun 22-də Bakı şəhər İcra Hakimiyyətinə müraciət edib. Şəhər rəhbərliyindən AXCP-yə bu gün cavab verilib. Cavab məktubunda zalların şəhər İcra Hakimiyyətinin nəzdində olmadığı diqqətə çatdırılıb. Eyni zamanda bildirilib ki, hər hansı konfrans zalları, saraylar və ya mədəniyyət evlərinin rəhbərliyi ilə razılaşma əldə olunduqdan sonra Bakı şəhər İcra Hakimiyyəti həmin yerdə AXCP-nin qurultayının keçirilməsinə etiraz etmir.

AXCP_Qurultay