Daxili siyasət

Ana səhifə

Daxili siyasət

Müsavat Partiyası AXCP-yə neçə dairədə güzəştə gedəcəyini açıqlayıb

13 avqust 2010 12:45 (UTC +04:00)

Bu barədə APA-ya Müsavat Partiyası Mərkəzi İcra Aparatının rəhbəri Arif Hacılı məlumat verib.

Müzakirələrin nəticəsi olaraq, Müsavatın AXCP-yə güzəştə gediləsi mümkün olan 36 seçki dairəsi müəyyənləşdirilib. Eyni zamanda, Müsavat Partiyası üçün vacib olan dairələr və namizədlər də müəyyən olunub.

A. Hacılı güzəştə gediləcək və gedilməyəcək dairələrin adlarını hələ ki, mətbuata açıqlamaq niyyətində olmadıqlarını qeyd edib: «Aydındır ki, Müsavat Partiyası hansı namizədlərini güzəştə getmək istəmir. Bunlar, əsasən respublikada tanınmış siyasi xadimlər, müxtəlif vaxtlarla parlament üzvü olmuş, ictimaiyyətə yaxşı tanış olan, seçkilərdə çox səs qazanmaq imkanlarına malik namizədlərdir. Güzəştə getdiyimiz dairələr isə onlardır ki, orada ya Müsavatın namizədləri öz yerlərini koalisiya naminə AXCP-nin üzvlərinə güzəştə getməyə hazırdırlar, ya da Müsavat hələlik həmin dairələrdən namizəd irəli sürməyib».

A. Hacılı Demokratiya Uğrunda İttifaqla (DUİ) bundan əvvəl razılaşdırılmış dairələrdə DUİ-nin namizədlərini müdafiə etmək fikrindən daşınmadıqlarını da deyib: «AXCP Müsavat-AXCP-DUİ-nin vahid seçki blokunda birləşməsinin əleyhinədir, ancaq Müsavatla DUİ-nn əməkdaşlığına kifayət qədər loyal yanaşır. Ona görə də düşünürəm ki, mövcud nüansları aradan qaldırmaq, demokratik müxalifət namizədlərinin müdafiəsinin koordinasiyasını təşkil etmək mümkün olacaq».

Qeyd edək ki, avqustun 14-də Müsavat Partiyasının başqanı İsa Qəmbərlə AXCP sədri Əli Kərimlinin bir araya gələrək bu məsələlər ətrafında müzakirələri davam etdirəcəyi gözlənilir.

Onu da əlavə edək ki, AXCP Müsavata 30 dairədə güzəştə gedəcəyini açıqlayıb.

AXCP_Müsavat