Daxili siyasət

Ana səhifə

Daxili siyasət

AXCP-nin qurultayı təxirə salınıb

17 avqust 2010 08:17 (UTC +04:00)

AXCP sədrinin müavini Nurəddin Məmmədlinin APA-ya verdiyi məlumata görə, bu barədə qərar AXCP Rəyasət Heyətinin iclasında qəbul olunub.

N. Məmmədli bildirib ki, qurultayın təxirə salınmasına səbəb tədbirin keçirilməsi üçün yer probleminin olmasıdır: “Bakı Şəhər İcra Hakimiyyətinin (BŞİH) bizə edilən təklifinə təəssüf ki, adekvat reaksiya yoxdur. Yenə də uzun mərhələli bir razılaşdırma prosesindən keçmək zərurəti yaranıb”.

AXCP sədrinin müavini bildirib ki, özəl zallara, həmçinin mədəniyyət saraylarına müraciət etsələr də, istədikləri cavabı ala bilməyiblər: “Müraciət etdiyimiz yerlərin heç biri məsuliyyəti üzərinə götürmək istəmir”.

Bununla yanaşı, N. Məmmədli AXCP-nin tezliklə qurultay keçirməkdə israrlı olduğunu deyib: “Qurultayı keçirməklə bağlı bizim heç bir problemimiz yoxdur. Yer tapa bilsək, bir aya keçirə bilərik”.

Qeyd edək ki, AXCP BŞİH-ə müraciət edərək qurultay keçirilməsi üçün yer ayrılmasını xahiş edib. BŞİH-in AXCP-yə göndərdiyi cavab məktubunda zalların BŞİH-in nəzdində olmadığı diqqətə çatdırılıb. Eyni zamanda bildirilib ki, hər hansı konfrans zalları, saraylar və ya mədəniyyət evlərinin rəhbərliyi ilə razılaşma əldə etdikdən sonra həmin yerdə avqustun 21-də AXCP-nin növbəti V (VIII) qurultayının keçirməsinə BŞİH etiraz etmir. BŞİH məktubda, həmçinin AXCP-dən keçiriləcək qurultayın yeri və vaxtı haqqında onlara məlumat verməyi xahiş edib.

AXCP_qurultay