Daxili siyasət

Ana səhifə

Daxili siyasət

AXCP-yə qurultay keçirmək üçün yer ayrılıb

18 avqust 2010 10:11 (UTC +04:00)

Bu barədə APA-ya N. Məmmədli məlumat verib.

Onun sözlərinə görə, Nizami rayonu ərazisində yerləşən “Təbriz” kinoteatrı AXCP-nin qurultay keçirmək üçün müraciət etdiyi yerlərdən biri olub. Kinoteatrdan isə AXCP-yə bildirilib ki, bunun üçün Nizami rayon icra Hakimiyyətinə müraciət etmək lazımdır. N. Məmmədli bir neçə gün əvvəl Nizami RİH-ə müraciət etdiklərini qeyd edib: “Bu gün bizə zəng vurub bildirdilər ki, avqustun 21-də “Təbriz” kinoteatrında qurultay keçirə bilərik. Biz isə həmin gün üçün qurultayı təxirə salmışıq. Bunu RİH nümayəndəsinə də dedik. O isə bildirdi ki, “Təbriz” kinoteatrı ilə müqavilə bağlayaraq qurultayı istənilən vaxt keçirə bilərik. Ona görə də müzakirələr apararaq qurultayı keçirəcəyimiz vaxtı müəyyənləşdirəcəyik”.

Nizami rayon İcra Hakimiyyəti (RİH) başçısının müavini İldırım Mehdiyev APA-ya açıqlamasında məlumatı təsdiqləyib. N. Məmmədliyə zəng vurduğunu deyən İ. Mehdiyev AXCP-nin özəl “Təbriz” kinoteatrında istədikləri vaxt qurultay keçirə biləcəklərini deyib: “Bizə edilən müraciətdən sonra araşdırma apardıq, heç bir etirazımızın olmağını bildirdik. Bunun üçün yenidən Bakı Şəhər İcra Hakimiyyətinə və Nizami rayon İcra Hakimiyyətinə müraciət etməyə də ehtiyac yoxdur. Yalnız “Təbriz” kinoteatrının adına rəsmi müraciət edərək müqavilə imzalamaq lazımdır”.

Qeyd edək ki, iyulun 22-də AXCP BŞİH-ə müraciət edərək qurultay keçirilməsi üçün yer ayrılmasını xahiş edib. BŞİH-in AXCP-yə göndərdiyi cavab məktubunda zalların BŞİH-in nəzdində olmadığı diqqətə çatdırılıb. Eyni zamanda bildirilib ki, hər hansı konfrans zalları, saraylar və ya mədəniyyət evlərinin rəhbərliyi ilə razılaşma əldə etdikdən sonra həmin yerdə avqustun 21-də AXCP-nin növbəti V (VIII) qurultayının keçirməsinə BŞİH etiraz etmir. BŞİH məktubda həmçinin AXCP-dən keçiriləcək qurultayın yeri və vaxtı haqqında onlara məlumat verməyi xahiş edib. AXCP-nin avqustun 16-da keçirilən Rəyasət Heyətinin toplantısında isə qurultayın təxirə salınması qərara alınıb.

AXCP_qurultay