Daxili siyasət

Ana səhifə

Daxili siyasət

Fuad Qəhrəmanlı: “DUİ AXCP-nin Müsavatla razılaşaraq güzəştə getdiyi dairədən namizəd versə, biz də oradan namizəd irəli sürəcəyik”

19 avqust 2010 15:35 (UTC +04:00)

Bakı. Pərvin Abbasov – APA. “AXCP ilə Müsavat Partiyası arasında xeyli sayda dairə üzrə razılaşma əldə edilib. Aparılacaq müzakirələrdən sonra belə dairələrin sayı daha da artacaq. Demokratiya Uğrunda İttifaqla Müsavat arasında danışıqların isə bizim Müsavatla apardığımız müzakirələrə heç aidiyyəti yoxdur”. Bunu APA-ya açıqlamasında Azərbaycan Xalq Cəbhəsi Partiyasının (AXCP) sədr müavini Fuad Qəhrəmanlı deyib. Onun sözlərinə görə, AXCP Müsavat-DUİ danışıqlarını heç bir formada nəzərə almayacaq: “DUİ-dən olan namizədlər seçkidə Müsavatın kvotasından iştirak edə bilərlər. Lakin həmin dairələr çox güman ki, Müsavatla bizim birgə razılaşdırmadığımız dairələr olacaq. Həmin dairələrdə DUİ-nin namizədləri yalnız Müsavat Partiyası tərəfindən müdafiə olunacaq. AXCP isə həmin dairələrdən namizəd verəcək. Yalnız istisna hal ola bilər ki, AXCP DUİ-nin namizədi olan dairədən namizəd irəli sürməsin”.

F. Qəhrəmanlı deyib ki, AXCP-nin Müsavata güzəştə getdiyi dairədən DUİ-nin namizədləri irəli sürülsə, AXCP də oradan namizəd verəcək: “Müsavatın DUİ-yə güzəştə getdiyi həmin dairədən AXCP-nin də namizədi olacaq. Çünki həmin dairələr üzrə Müsavatla razılaşma olacağına baxmayaraq, bunlar Müsavatın namizədi hesab olunmur”.

DUİ-yə daxil olan Klassik Xalq Cəbhəsi Partiyasının (KXCP) sədri Mirmahmud Mirəlioğlu APA-ya deyib ki, hazırda danışıqlar getdiyindən bu cür mövzularda danışmaq hələ tezdir: “Seçki bitənə qədər hərə bir söz deyəcək. Hələ ki, danışıqlar gedir. Sabah da Müsavatın DUİ ilə məsləhətləşməsi olacaq. Onda da ortalığa başqa vəziyyət çıxacaq. Ona görə də tələsmək lazım deyil. Hələlik nə blok, nə vahid namizəd, nə də başqa məsələ var. Yalnız şərhlər və gəzişmələr müşahidə olunur. Kimin kiminlə hara qədər əməkdaşlıq edəcəyini danışıqların nəticəsi göstərəcək. Hələlik görünən budur ki, Müsavat AXCP ilə bu və ya digər dairələrlə bağı danışıqlar aparır. Biz isə bunun nəticəsini gözləyirik. AXCP də bizim Müsavatla məsləhətləşmələrimizin nəticəsini gözləyəcək”.

Müsavat Partiyası Mərkəzi İcra Aparatının rəhbəri Arif Hacılı isə APA-ya deyib ki, təmsil olunduğu partiya DUİ ilə 6 dairə üzrə razılıq əldə edib. Həmin dairələrdə Müsavat Partiyası namizəd irəli sürməyəcək: “Bunlar, əsasən DUİ-yə daxil olan partiyaların sədrlərinin namizədliyini irəli sürəcəyi dairələr olacaq. Həmin dairələr üzrə AXCP ilə razılaşma əldə etməyəcəyik. DUİ də, öz növbəsində Müsavatın namizədlərinin bir qismini müdafiə edəcəyini desə də, konkret say bilinmir”.

A. Hacılı onu da deyib ki, Müsavat rəhbərliyi istənilən halda seçki kampaniyası dövründə demokratik qüvvələrin ən azı bir-birinə qarşı kampaniyası aparmamasına nail olmaq əzmindədir.

AXCP_Müsavat