Daxili siyasət

Ana səhifə

Daxili siyasət

ADP İdarə Heyətinin toplantısı keçirilib

23 avqust 2010 13:46 (UTC +04:00)

Bakı. Pərvin Abbasov – APA. Bu gün Azərbaycan Demokrat Partiyası (ADP) İdarə Heyətinin növbəti toplantısı keçirilib. Bu barədə APA-ya ADP-nin mətbuat xidmətindən məlumat verilib.

Toplantıda ölkədə və beynəlxalq aləmdə baş verən ictimai-siyasi proseslər əsas müzakirə obyekti olub. Türkiyə prezidenti Abdulla Gülün Azərbaycana səfərinin nəticələrinə diqqət çəkən toplantı iştirakçıları bu səfərin iki qardaş ölkə arasında qardaşlıq və dostluq münasibətlərinin davam etdirilməsi və strateji əməkdaşlıq baxımından çox əhəmiyyətli olduğunu bildirib və əldə edilən strateji əməkdaşlığın hər iki ölkə üçün faydalı olduğunu qeyd edib.

İdarə Heyəti Rusiya prezidenti Dmitri Medvedyevin Ermənistana səfəri və bu səfər zamanı iki ölkə arasında əldə edilmiş hərbi razılaşmaların Azərbaycan və bütövlükdə Cənubi Qafqaz üçün yarada biləcəyi təhlükədən narahat olduqlarını bildirib.

Son vaxtlar Azərbaycanın şimal sərhədində terror aktlarının artması və bu aktlar zamanı xeyli insan itkisinin yaranmasından narahat olduğunu bildirən partiya rəsmiləri beynəlxalq təşkilatları Rusiya ərazisində baş verən terror aktlarının qarşısının alınmasında yardımçı olmağa və həmin ölkənin terrora qarşı mübarizə adı altında antidemokratik fəaliyyət göstərməsinə imkan verməməyə çağırıb.

Sonda cari məsələlərlə bağlı bir sıra qərarlar qəbul edilib.