Daxili siyasət

Ana səhifə

Daxili siyasət

AMİP ATƏT-in Bakı ofisinə etiraz edir

24 avqust 2010 16:14 (UTC +04:00)

Bakı. Pərvin Abbasov - APA. Azərbaycan Milli İstiqlal Partiyası (AMİP) ATƏT-in Bakı ofisinin təşkilatçılığı ilə qarşıdan gələn parlament seçkilərinə həsr olunmuş və bir sıra siyasi partiyaların, kütləvi informasiya vasitələri rəhbərlərinin iştirakı ilə “Parlament seçkilərində KİV-in rolu nədir?” mövzusunda keçirilən tədbirə dəvət olunmaması ilə bağlı bəyanat yayıb.

Qurumun mətbuat xidmətindən APA-ya daxil olan bəyanatda partiyanın tədbirə dəvət edilməməsinin AMİP tərəfindən təəccüb və təəssüflə qarşılandığı bildirilib. Bəyanatda vurğulanıb ki, ATƏT-in Bakı ofisinin ölkədəki ictimai-siyasi proseslərə geniş nüfuz etməyə sahib aparıcı müxalifət partiyalarından biri olan AMİP-ə qarşı sərgilədiyi ögey münasibət başa düşülən deyil: “Partiya ATƏT-in Bakı ofisinin Azərbaycanda demokratikləşmə, azad və ədalətli seçkilər, söz azadlığı, insan haqları, eləcə də vətəndaş cəmiyyəti uğrunda göstərdiyi fəaliyyətini müsbət qiymətləndirməklə yanaşı, siyasi partiyalara, xüsusən də AMİP-ə qarşı göstərdiyi ayrı-seçkiliyə kəskin etirazını bildirir”.

AMİP hesab edir ki, ATƏT kimi nüfuzlu bir qurum, həqiqətən də, Azərbaycanda yüksək və sivil dəyərlərin formalaşmasına və inkişafına öz töhfəsini vermək istəyirsə, fəaliyyətini şəffaflıq və reallıq üzərində qurmalıdır: “Partiya ümid edir ki, ATƏT-in Bakı ofisi bundan sonrakı fəaliyyətində şəxsi münasibətləri, qərəzli yanaşmaları, ayrı-seçkilikləri kənara qoyaraq daşıdığı prinsipləri rəhbər tutacaq”.