Daxili siyasət

Ana səhifə

Daxili siyasət

AMİP rəhbərliyi Ümid Partiyasının sədri İqbal Ağazadə və QAT sədri Akif Nağı ilə görüşüb

31 avqust 2010 15:50 (UTC +04:00)

Bakı-APA. AMİP sədri Yusif Bağırzadə və baş katib Arzuxan Əlizadə bu gün Ümid Partiyasının sədri İqbal Ağazadə ilə görüşüb. Partiyanın mətbuat və informasiya xidmətindən APA-ya verilən məlumata görə, görüşdə AMİP-in bir müddət əvvəl Dağlıq Qarabağ probleminin həlli barədə qəbul etdiyi müraciət, seçki məsələləri, eləcə də partiyalar arası əməkdaşlıqla bağlı müzakirələr aparılıb.

AMİP sədri Yusif Bağırzadə münaqişə ilə bağlı partiyanın mövqeyini bir daha çatdıraraq qeyd edib ki, Azərbaycan ATƏT-in Minsk Qrupunun vasitəçiliyindən imtina etməli, işğal olunmuş ərazilər qeyd-şərtsiz boşaldılmalı və BMT-nin Təhlükəsizlik Şurasının 4 məlum qətnaməsi yerinə yetirilməlidir.

Münaqişənin həlli istiqamətində aparılan danışıqların səmərə vermədiyini və “Madrid prinsipləri”nin Azərbaycan üçün təhlükə yaratdığını vurğulayan baş katib Arzuxan Əlizadə bunun qarşısının alınmasının yeganə yolunun milli birlikdən bilavasitə asılı olduğunu söyləyib.

AMİP-in təşəbbüsünü müsbət qiymətləndirən İqbal Ağazadə Azərbaycanın beynəlxalq aləmdə getdikcə təklənməsindən və güzəştli mövqeyindən narahatlığını ifadə edib. O, partiya ilə AMİP arasında əməkdaşlığın bundan sonra da davam etməsində maraqlı olduğunu bildirib.

Bu gün AMİP sədri Yusif Bağırzadə və baş katib Arzuxan Əlizadə Qarabağ Azadlıq Təşkilatının sədri Akif Nağı ilə də görüşüblər. QAT sədri Akif Nağı Dağlıq Qarabağ problemi ilə bağlı AMİP-in təkliflərinə və təşəbbüslərinə dəstək verəcəklərini bildirib. Eyni zamanda o, siyasi partiyaların bu vacib problemə lazım qədər diqqət yetirmədiyindən narazılığını da gizlətməyib.