Daxili siyasət

Ana səhifə

Daxili siyasət

Tapdıq Abbas: “Müsavat Partiyasının Beyləqan rayon təşkilatı namizədliyimi müdafiə edir”

04 sentyabr 2010 16:58 (UTC +04:00)

Bakı. Ramil Məmmədli - APA. “Müsavat Partiyasının Məclisi deputatlığa namizədliyimi dəstəkləməmək barədə qərar qəbul etdi. Amma partiyanın Beyləqan rayon təşkilatı namizədliyimi müdafiə edir”.

Bunu APA-ya açıqlamasında Müsavat Partiyasının Məclis üzvü Tapdıq Abbas deyib. O bildirib ki, Müsavat Partiyasının ali orqanında onunla bağlı məsələnin müzakirəsini normal qiymətləndirir: “Çünki partiya istənilən üzvü ilə bağlı məsələni ali orqanında müzakirəyə çıxara bilər. Məclisin toplantısında aparılan müzakirələr tam demokratik şəraitdə getdi. Fəxri Xiyabanda olduğuma görə partiyadan çıxarılmağım və ya cəzalandırılmağımla bağlı səsvermə keçirildi. Partiya cəzalandırılmağımla bağlı qərar çıxardı və mənə töhmət verildi”.

T.Abbas müstəqil şəkildə parlament seçkilərində iştirak edib-etməyəcəyi ilə bağlı qərarını yaxın vaxtlarda açıqlayacağını da söyləyib: “Namizədliyimi verib-verməməyimlə bağlı hələ düşünməmişəm”.

Müsavat Partiyası Mərkəzi Nəzarət-Təftiş Komissiyasının sədri səlahiyyətlərini icra edən Əlövsət Talışxanlı isə APA-ya deyib ki, partiyanın Məclisinin qərarına hörmətlə yanaşsa da, məsələnin bu səviyyəyə qədər qaldırılmasının əleyhinə olub: “Tapdıq Abbas fəal müsavatçıdır, Azərbaycanı sevən və demokratiya uğrunda mübarizə aparan şəxslərdən biridir. Digər tərəfdən, onunla bağlı məsələ partiyanın Divanında müzakirə edilmişdi və xəbərdarlıq edilmişdi. Bunun Məclisdə də bu şəkildə davam etdirilməsi düzgün deyil. Düşünürəm ki, Məclis bu məsələdə səhvə yol verib. İkinci dəfə eyni məsələ ilə bağlı Tapdıq Abbasa töhmət verilməsi nizamnamədən kənardır”.

Ə.Talışxanlı onu da qeyd edib ki, T.Abbasın fərdi şəkildə parlament seçkilərində deputatlığa namizəd kimi iştirakını məhdudlaşdırmaq mümkün deyil.

Müsavat Partiyası Mərkəzi İcra Aparatının rəhbəri Arif Hacılı APA-ya bildirib ki, Məclisin qərarına hörmətlə yanaşır: “Tapdıq Abbasın son dövrlərdə atdığı addımlar Məclisdə çıxış edənlərin heç biri tərəfindən təqdir olunmadı. Partiyanın heç bir üzvü Tapdıq Abbasın hərəkətlərini düzgün hesab etmədi”.

A.Hacılı qeyd edib ki, T.Abbasın fərdi qaydada parlament seçkilərində namizədliyini irəli sürməsi partiyanın Məclisinin qərarına zidd addım olar.