Daxili siyasət

Ana səhifə

Daxili siyasət

Fikrət Cəfərov: “Ali Məclisin iclasında mənim mövqeyim dəstəklənməsə, partiyada parçalanma yaranacaq”

07 sentyabr 2010 14:46 (UTC +04:00)

Bakı. Ramil Məmmədli - APA. “KXCP Nərimanov rayon təşkilatının sədr müavini Fikrət Cəfərovun seçkidə 18 saylı Nərimanov-Nizami Seçki Dairəsindən DUİ-nin vahid namizədinin, yəni mənim xeyrimə geri götürməməsi heç bir problem yaratmır. Çünki o mənim əleyhimə səsverməyə ciddi təsir göstərə bilməyəcək”. Bunu APA-ya açıqlamasında Azadlıq Partiyasının sədri Əhməd Oruc deyib. Onun sözlərinə görə, DUİ F. Cəfərovun namizədliyini dəstəkləməyəcəyi barədə qərar qəbul edib: “KXCP sədri Mirmahmud Mirəlioğlu da dəfələrlə bu məsələ haqda öz fikrini bildirib. O, DUİ-nin namizədini dəstəkləyəcəyini söyləyib. Mən də KXCP-nin Fikrət Cəfərov barəsində sərt qərar verməsini istəmirəm”.

KXCP Nərimanov rayon təşkilatının sədr müavini Fikrət Cəfərov isə APA-ya deyib ki, üzvü olduğu partiyanın 18 saylı Nərimanov-Nizami Seçki Dairəsindən onun namizədliyini dəstəkləyəcəyinə inanır: “Partiyanın deputatlığa namizədlərin siyahısında mənim, DUİ-nin siyahısında isə Əhməd Orucun adı var. KXCP rayon təşkilatının da seçkidə mənim namizədliyimi müdafiə etməsi barədə qərarı var”.

O bu məsələnin sabah partiyanın Ali Məclisində müzakirə olunacağını da deyib: “Yəqin ki, partiya həmin dairədən mənim namizədliyim müdafiə edəcək”. F. Səfərovun fikrincə, KXCP-nin Əhməd Oruca güzəştə getməsinə lüzum yoxdur: “Əhməd Orucun hansı xidmətləri var ki, KXCP, yaxud da mən ona güzəştə gedim?”

F. Cəfərov onu da qeyd edib ki, Ali Məclisinin sabah keçiriləcək sessiyasında Ə. Orucun dəstəklənməsi barədə qərarı verilsə, partiyada fikir ayrılığı yarana bilər: “Mənim mövqeyim dəstəklənməsə, partiyada parçalanma yaranacaq. Çünki bu məsələ mənim üçün çox vacibdir”.

KXCP sədri Mirmahmud Mirəlioğlu isə APA-ya bildirib ki, razılaşdırılmış dairələrlə bağlı KXCP Ali Məclisinin sabah keçiriləcək toplantısında hər şeyə aydınlıq gətiriləcək: “Fikrət Cəfərovun namizədliyi ilə bağlı məsələ də Ali Məclisin sessiyasında müzakirə olunacaq. DUİ-nin namizədi Əhməd Orucdur. Sessiyada da DUİ-nin qərarlarının həyata keçirilməsinə çalışacağıq”.

M. Mirəlioğlu ümidvar olduğunu bildirib ki, Fikrət Cəfərov partiya, obyektivlik və demokratiya naminə partiyanın ümumi işin xeyrinə olacaq qərarını dəstəkləyəcək.