Daxili siyasət

Ana səhifə

Daxili siyasət

Prezident ölkəyə gələn əcnəbilərə və vətəndaşlığı olmayan şəxslərə vizaların rəsmiləşdirilməsi ilə bağlı bəzi məsələlər haqqında fərman imzalayıb

13 sentyabr 2010 18:28 (UTC +04:00)

Bakı-APA. Azərbaycan prezidenti İlham Əliyev ölkəyə gələn əcnəbilərə və vətəndaşlığı olmayan şəxslərə vizaların rəsmiləşdirilməsi ilə bağlı bəzi məsələlər haqqında fərman imzalayıb. APA-nın məlumatına görə, fərmana əsasən, «Miqrasiya idarəetmə sisteminin inkişafı və «Azərbaycan Respublikasının bəzi qanunvericilik aktlarına əlavələr və dəyişikliklər edilməsi barədə» Azərbaycan Respublikasının Qanununun tətbiq edilməsi haqqında» Azərbaycan Respublikası prezidentinin 2008-ci il 5 avqust tarixli 805 nömrəli Fərmanına bir sıra dəyişikliklər edilib. Bundan əlavə fərmana görə, oktyabrın 15-dən etibarən əcnəbilər və vətəndaşlığı olmayan şəxslər yalnız aşağıdakı hallarda viza alınması üçün ərizə ilə birbaşa Azərbaycan Respublikasının Xarici İşlər Nazirliyinə müraciət edə bilərlər:
Azərbaycan Respublikasının dövlətlərarası və ya hökumətlərarası müqavilələrində nəzərdə tutulmuş hallarda;
Azərbaycan Respublikası prezidentinin, Azərbaycan Respublikası baş nazirinin, Azərbaycan Respublikası Milli Məclisi sədrinin, Azərbaycan Respublikası prezidentinin administrasiyası rəhbərinin, Naxçıvan Muxtar Respublikası Ali Məclisi sədrinin rəsmi dəvəti ilə Azərbaycan Respublikasına gəldikdə;
Azərbaycan Respublikası Konstitusiya Məhkəməsi sədrinin, Azərbaycan Respublikası Ali Məhkəməsi sədrinin, Azərbaycan Respublikası baş prokurorunun, Azərbaycan Respublikası İnsan hüquqları üzrə müvəkkilinin (ombudsmanın), Azərbaycan Respublikası Mərkəzi Seçki Komissiyası sədrinin, mərkəzi icra hakimiyyəti orqanı rəhbərinin Azərbaycan Respublikasının Dövlət Miqrasiya Xidməti ilə razılaşdırılmış rəsmi dəvəti əsasında Azərbaycan Respublikasına gəldikdə;
xarici ölkələrin Azərbaycan Respublikasında fəaliyyət göstərən diplomatik nümayəndəlik və konsulluqlarının, habelə beynəlxalq təşkilatların nümayəndəliklərinin əməkdaşları, inzibati-texniki xidmət heyətinə daxil olan şəxslər və onların ailə üzvləri, həmçinin əcnəbilər xüsusi diplomatik missiya ilə Azərbaycan Respublikasına gəldikdə;
fövqəladə halların nəticələrinin aradan qaldırılmasında iştirak etmək məqsədi ilə Azərbaycan Respublikası Fövqəladə Hallar Nazirliyinin rəsmi təqdimatı əsasında Azərbaycan Respublikasına gəldikdə;
Azərbaycan Respublikasında yaşayan ailə üzvünün vəfatı ilə əlaqədar Azərbaycan Respublikasına gəldikdə (ailə üzvünün vəfatını təsdiq edən sənəd əsasında).
Bnudan əlavə fərmanla «Viza alınması üçün əcnəbilərin və vətəndaşlığı olmayan şəxslərin ərizə ilə birbaşa Azərbaycan Respublikasının Xarici İşlər Nazirliyinə müraciət etdiyi halların müəyyən edilməsi barədə» Azərbaycan Respublikası Nazirlər Kabinetinin 2010-cu il 23 fevral tarixli 40 nömrəli qərarı qüvvədən düşmüş hesab edilir.
Azərbaycan Respublikasının Nazirlər Kabinetinə bir ay müddətində Azərbaycan Respublikası Nazirlər Kabinetinin və müvafiq mərkəzi icra hakimiyyəti orqanlarının normativ hüquqi aktlarının bu Fərmana uyğunlaşdırılmasını təmin etsin və bu barədə Azərbaycan Respublikasının Prezidentinə məlumat vermək; öz səlahiyyətləri daxilində bu Fərmandan irəli gələn digər məsələləri həll etmək tapşırılıb.
Fərmanla həmçinin Azərbaycan Respublikasının Xarici İşlər Nazirliyinə vizaların rəsmiləşdirilməsi prosedurunda edilmiş dəyişikliklər barədə xarici ölkələrin müvafiq orqanlarına məlumat vermək; bu Fərmanda nəzərdə tutulmuş rəsmi dəvətlərin qeydiyyatının aparılmasını təmin etmək tapşırılıb.