Daxili siyasət

Ana səhifə

Daxili siyasət

Azərbaycan İslam Partiyası: “Quran”ın təhqir olunması təkcə müsəlman aləminə deyil, bütövlükdə bəşəriyyətə həqarətdir

14 sentyabr 2010 11:11 (UTC +04:00)

Bakı. Ramil Məmmədli - APA. Azərbaycan İslam Partiyası (AİP) ABŞ-da “Qurani-Kərim” kitabının cırılmasına həsr olunmuş tədbir keçirib. APA-nın məlumatına görə, partiyanın mətbuat katibi Akif Heydərli bildirib ki, “Quran”ın təhqir olunması təkcə müsəlman aləminə deyil, bütövlükdə bəşəriyyətə həqarətdir: “Bu aksiyanın qarşısı əvvəlcədən alına bilərdi. Lakin ABŞ islama olan münasibətini ortaya qoydu”.

Azərbaycan Birlik Partiyasının (ABP) sədri Xudu Xuduyev isə ABŞ-ı beynəlxalq terrorçu qruplar yaratmaqda və 11 sentyabr hadisəsinin təşkilatçısı olmaqda ittiham edib: “11 sentyabr hadisəsi dünyada müsəlmanlara qarşı ideoloji və hərbi kampaniya başlamaq üçün ABŞ-ın özü tərəfindən atılan addım idi”.

AİP-in keçmiş sədri Hacı Hacıağa Nuri hakimiyyətdəki Yeni Azərbaycan Partiyasını (YAP) və müxalifətdə təmsil olunan partiyaları bu məsələyə münasibət bildirməməkdə qınayıb.

Tədbirdə çıxış edən İslam Partiyasının sədri Hacı Mövsüm Səmədov, Fəzilət Partiyasının sədri Hacı Gündüz Hacıyev, Yaşıllar Partiyasının sədri Mais Güləliyev və Azərbaycan Ziyalılar Birliyinin sədri Eldəniz Quliyev də ABŞ-da islama qarşı aparılan kampaniyanın dayandırılmasını və Azərbaycanın dövlət səviyyəsində bu məsələyə münasibət bildirməsini istəyiblər.

Toplantının sonunda tədbir iştirakçıları adından “Qurani-Kərim”in cırılmasını pisləyən bəyanat da qəbul olunub.