Daxili siyasət

Ana səhifə

Daxili siyasət

Asim Mollazadə: “İlkin siyahıda adı açıqlanan şəxslərdən hansı qeydiyyatdan keçsə, “Demokratiya” seçki blokunun vahid namizədi o olacaq”

16 sentyabr 2010 12:21 (UTC +04:00)

Bakı. Ramil Məmmədli-APA. “İlkin siyahıda adı açıqlanan şəxslərdən hansı qeydiyyatdan keçsə, “Demokratiya” seçki bloku tərəfindən vahid namizəd kimi qəbul olunacaq”. Bu açıqlamanı APA-ya Demokratik İslahatlar Partiyasının (DİP) sədri Asim Mollazadə verib.

Üç seçki dairəsində blokun iki namizədlə çıxış etməsinin ciddi problem olmadığını deyən A. Mollazadə bildirib ki, bu ilkin siyahıdır və sonrakı mərhələdə həmin məsələ öz həllini tapacaq: “Əslində, VHP sədri Sabir Rüstəmxanlı ilə çox ciddi müzakirələrimiz olub. Ortaq bir mövqe nümayiş etdirməkdə, partiyanın mövqeyini və vahid namizədləri müəyyənləşdirməkdə də heç bir problemimiz olmayıb. Sadəcə olaraq blokdaxili rəqabətin olması müsbət haldır. Seçki kampaniyasını daha yaxşı təşkil edənlərə isə biz dəstək verəcəyik”. A. Mollazadənin sözlərinə görə, bunu blokdaxili inkişaf kimi xarakterizə etmək də mümkündür.

Vətəndaş Həmrəyliyi Partiyası (VHP) Sabir Rüstəmxanlı isə APA-ya deyib ki, seçki kampaniyası başlanana qədər bu məsələ aydınlaşacaq: “Bir dairədən blokun iki namizədinin olmasını partiyalar arasında ziddiyyətin olması və ya problem kimi qiymətləndirmək düzgün deyil. Seçki kampaniyasına start verilənə qədər siyahının açıqlanmasını yubada bilməzdik. Daha doğrusu bunu istəmədik”.

Siyahıda DİP-in VHP-dən az namizədinin olmasına da münasibət bildirən S. Rüstəmxanlı bunu özünəməxsus şəkildə xarakterizə edib: “Demokratik İslahatlar Partiyası daha gənc partiyadır. Bizim partiyanın isə 18 yaşı var, onların isə 5 yaşı. Bu, təbii haldır”.

Qeyd edək ki, “Demokratiya” seçki bloku seçkilərə 117 seçki dairəsindən 120 namizədlə qatılır. 46 saylı Şirvan, 70 saylı Masallı şəhər və 87 saylı Ağsu-İsmayıllı seçki dairələrində razılıq əldə olunmadığından, bu dairələrdə VHP və DİP hər biri öz namizədi ilə iştirak edəcək. Digər 114 dairədə isə blok vahid siyahı ilə təmsil olunur. Blokun irəli sürdüyü namizədlərin 84-i VHP-ni, 36 isə DİP-i təmsil edir.

“Demokratiya”_seçki_bloku