Daxili siyasət

Ana səhifə

Daxili siyasət

Nizami Cəfərov: “Milli soyad sonluqları ilə bağlı təkliflər yekunlaşdırılaraq Ədliyyə Nazirliyinə təqdim olunub”

17 sentyabr 2010 14:47 (UTC +04:00)

APA-nın məlumatına görə, bu barədə Milli Məclisin deputatı, milli soyadlarla bağlı komissiyanın üzvü Nizami Cəfərov bildirib.

Onun sözlərinə görə, artıq alimlər bununla bağlı öz araşdırmalarını tamamlayıb. Azərbaycan Milli Elmlər Akademiyasında yaradılmış komissiya ümumi prinsipləri müəyyənləşdirib. Daxili İşlər Nazirliyi və Ədliyyə Nazirliyinin xətti Azərbaycandakı mövcud ad, soyad və ata adının siyahısı tutulub. Əlavə adlarla bağlı xüsusi bir siyahı hazırlanıb.

N. Cəfərov hesab edir ki, soyad sonluqlarına keçid iki formada ola bilər. Birincisi, bu, dövlət başçısının sərəncamı ilə, ikincisi isə Ailə Məcəlləsinə dəyişiklik formasında edilə bilər. Millət vəkilinin sözlərinə görə, soyad sonluqlarının dəyişdirilməsi yalnız ölkə ərazisində yaşayan azərbaycanlılara şamil olunacaq. Ölkədə yaşayan ruslar və digər millətlərin nümayəndələri ənənəvi soyad və adlarını saxlayacaqlar: «Burada bir problem ola bilər ki, o da fərdi qaydada həll olunacaq. Yəni, müxtəlif millətlərlə qarışıq ailələrin sayı artmaqdadır. Ona görə də müxtəlif soyad formasının götürülməsi imkanları yaranır. Düşünürük ki, burada da müəyyən demokratiya olmalıdır. Belə hallarda məsələ daha çox məhkəmələr vasitəsi ilə bu həll olunacaq».

N. Cəfərov həmçinin əlavə edib ki, təhlillərdən sonra əsasən soyad sonluğu olaraq «lı», «li», «lu», «lü», «soy», «oğlu», «gil» və şəkilçisiz soyad təklif olunub: «Bu gün yalnız «zadə»nin problemi var. Aparılan araşdırmalara görə, hazırda ölkədə soyadların 80 faizinə qədəri «ov» və «yev», 10 faizə qədəri «zadə», qalan 10 faizi isə “lı», «li», «lu», «lü» sonluğu ilə qurtarır. Şəkilçisiz soyadlar çox işlənsə də, onların rəsmiləşənləri çox azdır. Mənə elə gəlir ki bu, ən perspektivli soyad formasıdır».

Millət vəkili onu da qeyd edib ki, yeni soyadlar yeni doğulan uşaqlara aid ediləcək. Amma bununla belə, istəyən şəxs öz soyadını dəyişə biləcək. Bunun üçün mövcud şərtlərin sadələşdirilməsi, müvafiq qanunvericilikdə müəyyən dəyişikliklərin aparılması mümkündür.