Daxili siyasət

Ana səhifə

Daxili siyasət

Əli Əhmədov: “İnanıram ki, müstəqil şəkildə namizədliklərini irəli sürmüş YAP üzvləri öz namizədliyini geri götürəcəklər”

21 sentyabr 2010 09:42 (UTC +04:00)

Bakı. Pərvin Abbasov-APA. “Yeni Azərbaycan Partiyasının siyahısı partiya daxilində aparılan əhatəli və geniş müzakirələrin nəticəsidir”. APA-nın məlumatına görə, bu fikirləri YAP sədrinin müavini - icra katibi Əli Əhmədov partiyanın rəsmi saytına verdiyi müsahibəsində bildirib. O, bəzi YAP üzvlərinin müstəqil şəkildə öz namizədliyini irəli sürməsi faktına da münasibət bildirib: “Doğurdan da məsələ ilə bağlı müşahidə olunan bir neçə fakt var. 500 mindən çox üzvü olan partiya üçün 125 dairə üzrə cəmisi bir neçə faktın olması hesab edirəm ki, partiyanın daxilində nizam-intizamı, monolitliyi çox əyani şəkildə ifadə edir. Məmnunluq hissi ilə qeyd etmək istəyirəm ki, YAP üzvlərinin mütləq əksəriyyəti partiyanın vahid seçki strategiyasını və taktikasını qətiyyətlə bəyənir və onun həyata keçirilməsinə öz imkanları daxilində kömək göstərirlər. O ki, qaldı qeyd olunan faktlara, güman edirəm ki, bunlarla əlaqədar yerli strukturlarda müvafiq işlər aparılacaq. Əlbəttə, cəmi bir neçə fakt YAP kimi böyük bir partiyanın seçki kampaniyasının uğurla həyata keçirilməsinin üzərinə hər hansı bir kölgə salmaq imkanına malik deyil. Bizim opponentlərimizin də bu faktlardan yapışaraq YAP-a qarşı təbliğat aparmaları da tamamilə iflasa məhkumdur. Çünki bir neçə fakt əsasında yarım milyondan yuxarı insanın birləşdiyi YAP-ın daxili birliyinə kölgə sala biləcək hər hansı inandırıcı fikir irəli sürmək mümkün deyil. İnanıram ki, həmin bir neçə nəfər də partiyanın vahid seçki kampaniyasının uğurla həyata keçirilməsi naminə öz namizədliyini geri götürəcək”.

Əli Əhmədov bildirib ki, YAP-ın rəqibləri olmaq istəyən bəzi müxalifət partiyaları çox səmərəsiz üsullarla partiyaya qarşı mübarizə aparırlar: “Bütövlükdə, YAP olaraq bizim müxalifətdən çoxsaylı fərqlərimizdən biri də ondan ibarətdir ki, müxalifət YAP-a qarşı mübarizə aparır, YAP isə Azərbaycanda heç bir partiyaya qarşı mübarizə aparmır. Bizim hədəfimiz insanların inamını, rəğbətini qazanmaqdır. Biz seçicilərin səsi uğrunda mübarizə aparırıq. Biz nəyəsə, kiməsə qarşı mübarizə aparmırıq. Bizim mübarizəmizin hədəfi pozitiv yüklənmiş bir hədəfdir. Müxalifət isə bütün mübarizəsinə neqativ bir fon verir. Onlar hər zaman nəyə, kiməsə qarşı mübarizə aparırlar. Onlar unudurlar ki, seçkidə uğur qazanmaq üçün seçicilərin səsini əldə etmək lazımdır. Bu insanların rəğbəti uğrunda çalışmaq lazımdır. Bu, bizim müxalifətdən çoxsaylı fərqlərimizdən biridir. Digər bir məsələni də önə çəkmək istəyirəm ki, son vaxtlara qədər ayrı-ayrı müxalifət partiyalarının nəzarətində olan qəzetlərdə belə təhlillər aparmağa cəhdlər göstərilirdi ki, guya YAP müxalifətin hansı dairədən kimi namizəd kimi irəli sürəcəyini gözləyir və bundan sonra öz namizəd siyahısını açıqlayacaq. Birmənalı şəkildə bildirmək istəyirəm ki, YAP üçün bu və ya digər dairədə müxalifət tərəfindən kimin namizəd irəli sürülməsinin heç bir mənası və əhəmiyyəti yoxdur. Bu mövqeyimizin də ciddi səbəbləri mövcuddur. Birincisi, müxalifətdən fərqli olaraq biz hesab edirik ki, hər bir seçkinin taleyini seçici rəyi həll edir. Ona görə də, konkret namizədlərimizi bu və ya digər dairə üzrə müəyyənləşdirərkən orada hansı müxalifət nümayəndəsinin iştirak edəcəyini yox, bizim irəliyə sürəcəyimiz namizədə həmin dairənin seçicilərinin münasibətini öyrənməyə çalışmışıq və bunu əsas götürmüşük. YAP olaraq belə hesab edirik ki, istənilən dairədə bizim irəli sürdüyümüz namizədlər müxalifət partiyaları tərəfindən irəli sürülən namizədlərdən bütün parametrləri ilə üstündür”.

Əli Əhmədov YAP-ın daxili monolitliyinin hər bir partiya üzvü tərəfindən qorunacağını bildirib: “Bu mənada istər hazırkı parlamentdə təmsil olunan deputatların, istərsə də siyahıda adı olmayan insanların partiyanın aparacağı seçki kampaniyasına yaxından kömək edəcəyinə inanıram. Bu, partiyamızın daxili birliyinin möhkəmliyindən irəli gəlir. Və onlar da seçki kampaniyasının uğurla həyata keçirilməsinə öz tövhələrini verəcəklər. Təəssüflə qeyd etmək istəyirəm ki, bir sıra hallarda yenə də böhtan, əsası olmayan informasiyaları yaymaqla rəqiblərimiz YAP-ın içində problemlər yaratmağa cəhdlər göstərirlər. Amma bu vaxta qədər belə cəhdlər uğursuzluğa düçar olduğu kimi qətiyyətlə qeyd etmək istəyirəm ki, bundan sonra da müxalifətin illərlə bizə qarşı apardığı bu cür mənasız mübarizə nəticə verməyəcək”.