Daxili siyasət

Ana səhifə

Daxili siyasət

AMİP sədri Yusif Bağırzadə: “Mənim üçün həmişə dövlətçiliyimizin qorunması önəmli olub” - MÜSAHİBƏ

AMİP sədri Yusif Bağırzadə: “Mənim üçün həmişə dövlətçiliyimizin qorunması önəmli olub” - <font color=red>MÜSAHİBƏ</font>

27 sentyabr 2010 12:16 (UTC +04:00)

- AMİP-in digər siyasi partiyalardan fərqli olaraq parlament seçkilərinə təkbaşına qatılmasının səbəbi nədir?

- Seçkilərə təkbaşına qatılmağımızın əsas səbəb partiyanın gücünün göstəricisidir. Bildiyiniz kimi ölkədə yaranan ilk siyasi təşkilat kimi AMİP keçirilən bütün seçkilərdə fəal iştirak edib və zəngin təcrübə qazanıb. Partiyanın bloklardan və ittifaqlarda kənarda durmasının başqa səbəbləri də var. 2003-cü ildə keçirilən prezident seçkilərində AMİP AXCP ilə birlikdə “Qələbə” adlı seçki bloku yaratmasına baxmayaraq, müttəfiqimiz bizə real dəstək göstərmədi. Hətta, AXCP sədri Əli Kərimli seçkinin nəticələrini gözləmədən başqa blokun namizədini, konkret olaraq İsa Qəmbərin qalib gəldiyini elan etdi və onu dəstəklədi. Təbii ki, bu kimi halların baş verməsi AMİP-də birmənalı qarşılanmadı və bizi bloklara və birliklərə ehtiyatlı davranmağımıza rəvac verir. İkincisi, bloklar yaranan zaman ideoloji baxışları, prinsipləri və mövqeləri, bir kənara qoyaraq, şəxsi mənafelərin, yaxud da partiya maraqlarının əsas götürülməsi uğurlu nəticə vermir. Buna görə də biz bu seçki marafonunda təkbaşına iştirakımıza qərar verdik.

- Gələcək parlamenti necə görmək istərdiniz?

- Yeni formalaşdırılacaq parlamentdən gözləntilərim çoxdur. Öncə parlament büdcəyə nəzarət və qanunların işləmə mexanizmi təkmilləşdirilməlidir. Yəni parlament qəbul olunan qanunların icrasını diqqətdə saxlamalıdır. Həmçinin parlamentdə təmsil olunan müxalifət nümayəndələrinin ali qanunverici orqanın rəhbərliyində iştirakı təmin olunmalıdır. Hesab edirəm ki, parlament sədrinin müavini və ya komitə sədrləri səviyyəsində müxalifət nümayəndələrinin təmsilçiliyi normal qarşılanmalıdır. Bu effektli modeldir. Elə uzağa getməyək, qonşu Rusiyada bu modeldən istifadə olunur.

- Bu il keçiriləcək parlament seçkilərində iştirak edən siyasi partiyalar artıq məlumdur. Ötən dövrlərdə siyasi fəallıq göstərməyə çalışan bəzi partiyalar, o cümlədən Rəsul Quliyevin liderlik etdiyi ACP siyasi meydanlarda nədəncə görünmədi...

- Həmin partiya indi deyil, çoxdandır ki, siyasi proseslərdə yoxdur. ACP-nin seçkilərdə iştirak etməməsi bu partiyanın artıq sıradan çıxması deməkdir. İkincisi də, mən Rəsul Quliyevi səriştəsiz və cəsarətsiz şəxs hesab edirəm. Onun bütün iqtisadi və siyasi proqnozları tamamilə fiaskoya uğradı. Xatırlayırsınızsa, Rəsul Quliyev Bakı-Tiflis-Ceyhan neft boru xəttinin işləməyəcəyi və bu proyektin qeyri-rentabelliyi haqqında proqnozlar verirdi. Amma fakt odur ki, bu proyekt uğurla həyata keçirildi və Azərbaycanın iqtisadi inkişafına böyük təsir göstərdi. Bununla yanaşı BTC-nin istifadəsindən gələn gəlirlər dövlət büdcəsinin əsas hissəsini təşkil etməkdədir. Rəsul Quliyevin Azərbaycana qayıdıb siyasi fəaliyyət göstərəcəyini və seçkilərdə iştirak edəcəyini deməsini dəfələrlə eşitməyimizə baxmayaraq, o, dediklərinin heç birinin üzərində dura bilmədi. Yaratdığı partiyasının da nə yeri-yurdu var, nə də sədri. Bir partiyanın idarə edə bilməyən şəxsin Azərbaycanı idarə etmək fikrinə düşməsi qeyri-ciddi səslənir.

- MSK-da müxalifət nümayəndəsi olmanıza baxmayaraq 15 oktyabr 2003-cü ildə keçirilən prezident seçkilərinin yekun nəticələrini cəsarətli addım ataraq imzaladınız. Digər düşərgənin təzyiqlərinə və qınaq hədəfinə çevriləcəyinizi bilə-bilə nədən belə bir addım atdınız?

- 2003-cü ilin prezident seçkilərinə imza atmağıma mövcud qanunvericilik imkan verirdi və mən qanunu əsas götürərək belə bir cəsarətli addım atdım. Faktiki olaraq İlham Əliyev prezident seçkilərində qalib gəlmişdi. Həqiqətən də, bu imzaya görə mən müxalifət düşərgəsindən davamlı pressinq və təzyiqlərə, hətta, böhtanlara məruz qaldım. Baxmayaraq təkcə müxalifət düşərgəsindən deyil, hakimiyyətdə olan bəzi yüksək rütbəli məmurlar belə İ. Əliyevin qalib gəlməsinə şübhəli yanaşaraq, ona qarsı çıxsalar da, qanunun aliliyinə söykənərək yekun protokolu imzaladım. Bu təkcə hüquqi baxımdan deyil, mənəvi və psixoloji tərəfdən də cəsarətli addım idi. Mənim üçün həmişə dövlətçiliyimizin qorunması önəmli olub. Düşünürəm ki, hakimiyyət qollarının legitimləşdirilməsi dövlətimizin daha da möhkəmlənməsinə və hakimiyyət qollarına cəmiyyətdə olan inamın artmasına gətirib çıxarar.

Onu da deyim ki, 1998-ci ilin prezident seçkilərindən fərqli olaraq, 2003-cü ilin seçkilərində özünü qalib elan etmiş Müsavat başqanı İsa Qəmbərin əlində bunu təsdiq edəcək heç bir sənəd və protokol yox idi. Heç nə ilə də sübut etmək mümkün deyildi ki, həqiqətən də o, lazımi miqdarda səs alıb. Digər tərəfdən, səsvermə prosesi sona çatmamış İsa Qəmbərin tərəfdarlarının iğtişaş törətməsi və sonrakı proseslər göstərdi ki, doğru addım atmışam. İsa Qəmbərin faktiki olaraq öz tərəfdarlarını meydanda tək qoyaraq, 1990-cı il yanvar hadisələrindəki kimi evinə qapanaraq, siyasi proseslərdən kənarda qalması, insanları zərbə altında qoyması, təhrikçiliyi bir daha təsdiq etdi ki, mənim seçkinin yekun nəticələrinə yanaşmam düzgün idi və buna görə də peşman deyiləm.