Daxili siyasət

Ana səhifə

Daxili siyasət

Siyavuş Novruzov: “YAP özünün namizədlər siyahısında yeniliklər edib, siyahıya yeni simalar, yeni insanlar salınıb”

28 sentyabr 2010 15:15 (UTC +04:00)

O bildirib ki, YAP seçkidən-seçkiyə kifayət qədər təcrübə qazanır, həm Qərb texnologiyalarından yüksək səviyyədə istifadə olunur, həm də Azərbaycanın ictimai-siyasi mühitinə uyğun addımlar atılır: “Hesab edirəm ki, bu proseslərdə YAP-a heç bir alternativ ola bilməz. YAP bütün seçkilərdə qalib gəlib, bu dəfə də qalib gələcək”.

S. Novruzov YAP-ın siyahısının mövcud potensialı əks etdirmədiyi, siyahının daxili ziddiyyətlər yaratması və s. kimi iddialara da münasibət açıqlayıb: “Biz YAP olaraq hələ seçkilərə rəsmi start verilmədən öncə də bəyan etmişdik ki, partiyamızın namizədlər siyahısı ciddi təhlillər və araşdırmalara əsasən müəyyənləşdiriləcək. Həmin vaxt da müxalifət mətbuatı guya YAP-ın namizədlərini müəyyənləşdirə bilmədiyi haqda iddialar səsləndirirdi. Amma faktlar göstərdi ki, bütün bunlar yalandan başqa bir şey deyil. Bir daha xatırladıram ki, YAP namizədlərini müəyyənləşdirərkən ciddi araşdırmalara əsaslanıb. Bildiyiniz kimi, partiyamızın parlamentdə təmsil olunan 17 millət vəkilinin namizədliyini bu dəfə irəli sürmədik. Onların bir hissəsi öz istəyi ilə seçki prosesində iştirak etmək istəmədi. Bir hissəsinin isə fəaliyyəti dövrünün təhlili nəticəsində və yaxud da həmin dairələrdə yeni namizədlərin müəyyən olunması ilə əlaqədar olaraq namizədliyi irəli sürülmədi. 114 dairədə namizəd irəli sürmüşük. 11 dairədə isə bizə müttəfiq olan partiyaların namizədləri var ki, onlara qarşı alternativ irəli sürmürük. Eyni zamanda, Azərbaycanın tanınmış ictimai-siyasi xadimlərinin namizədliyi irəli sürülən dairələrdə onların namizədliyini dəstəkləyirik. Bu dəfə irəli sürülən namizədlərin siyahısına diqqət yetirsək, orada qadınların və gənclərin üstünlük təşkil etdiyini görə bilərik. Ümumiyyətlə, YAP hər dəfə öz tərkibində, istər partiyanın seçkili orqanlarında, istərsə də dövlətin ayrı-ayrı seçki qurumlarında islahatlar aparır. Bələdiyyə seçkilərində də cəmiyyət bu addımların şahidi oldu. Bu gün parlament seçkiləri öncəsi də analoji addımlar atılır. YAP özünün namizədlər siyahısında yeniliklər edib, siyahıya yeni simalar, yeni insanlar salınıb. Bu təbiidir, çünki partiyamızın sıraları günü-gündən genişlənir, yeni nəsil yetişir. Partiya sıralarına 18 yaşında qoşulanlar indi 40 yaşına gəlib çatıb və siyasi cəhətdən təkmilləşiblər. Onların da potensialından lazımi səviyyədə istifadə edirik”.

S. Novruzov bəzi müxalifət qəzetlərinin imzatoplama prosesində YAP-ın inzibati resurslardan istifadə etməsi barədə yazılara da münasibət bildirib: “Onlar şantaj, böhtan kampaniyasına başlayıblar. Demək istəyirəm ki, bu gün YAP-ın belə şeylərə heç bir ehtiyacı yoxdur. Əvvəlcədən də elan etmişdik ki, tərəfimizdən hər dairə üzrə imzatoplayan 10 şəxs müəyyənləşdirilib. Onlara treninqlər keçirilib, yəni bu prosesə hazırlaşıblar. Həmin şəxslər imza vərəqələri götürüldükdən bir neçə gün sonra imzaları doğru-düzgün toplayıblar və həmin sənədlər DSK-lara təqdim edilib. Bu insanlar neçə illərdir ki, bu işlərdə böyük təcrübə qazanan partiya fəallarıdırlar. Bütün rayon və şəhər təşkilatlarında seçki qərargahları yaradılıb. Seçki qərargahlarında minimum 15, maksimum 40 nəfərə yaxın üzvlər fəaliyyət göstərirlər. Əgər namizədin qeydə alınması üçün 450 imza gərəkdirsə, biz bunu 500 imza ətrafında müəyyənləşdirmişik. Yəni, imzatoplayan şəxslərin hər biri 1 imza vərəqəsini doldurub qərargaha təqdim edir. Bu bizim üçün çox kiçik prosesdir. Ən kiçik rayon təşkilatımızın üzvlərinin sayı 2 min nəfərdən çoxdur. O baxımdan bizim imzatoplama kampaniyasında hansısa problemlə üzləşməyimiz mümkün deyil. Bu səbəbdən YAP-ın hər hansı bir inzibati resursdan istifadə etməyə ehtiyacı yoxdur, digər tərəfdən qanun da bunu qadağan edir. Partiyanın rayon və şəhər təşkilatları sədrlərinin müşavirəsində də bu məsələlər geniş müzakirə olunub. İmza toplayan şəxslər üçün Seçki Məcəlləsinin müvafiq maddələrindən çıxarışlar verilib. Yəni bütün işlər qanunvericiliyə uyğun həyata keçirilib”.

seçki