Daxili siyasət

Ana səhifə

Daxili siyasət

Qüdrət Həsənquliyev: “Müsavat Partiyası özünü növbəti dəfə seçki ərəfəsində biabır elədi”

29 sentyabr 2010 14:49 (UTC +04:00)

Bakı. Pərvin Abbasov – APA. “Əlbəttə, Müsavat Partiyasının MSK-ya nümayəndə göndərməsi onların öz hüququdur. Ancaq məsələnin siyasi tərəfinə gəldikdə, Müsavat Partiyası özünü növbəti dəfə seçki ərəfəsində biabır elədi. Bunun başqa adı yoxdur”. Bunu APA-ya açıqlamasında Bütöv Azərbaycan Xalq Cəbhəsi Partiyasının (BAXCP) sədri, millət vəkili Qüdrət Həsənquliyev deyib. O, fikrini Müsavat Partiyanın MSK-ya son seçkilər zamanı deyil, indi nümayəndə göndərməsi ilə əsaslandırıb: “Ölkənin Konstitusiyasına əlavə və dəyişiklik ediləndə onlar MSK-ya nümayəndə göndərməyə ehtiyac görmədilər. Əgər həmin nümayəndələr MSK-da nəyəsə təsir edə biləcəklərsə, nə üçün referendum zamanı göndərmirdilər? Məgər referendum ölkə üçün parlament seçkilərindən daha az əhəmiyyətlidir? Sonra bələdiyyə seçkiləri oldu. Sıravi müsavatçılar namizədliklərini irəli sürdü, onlar yenə MSK-ya nümayəndə göndərmədilər, şərtləri, prinsipləri olduğunu dedilər. İndi isə partiyanın rəhbərliyində təmsil olunanlar namizədliklərini irəli sürüblər. Fikirləşirlər ki, MSK üzvü olan müsavatçı hansısa məsələyə təsir edə, bunların seçilməsinə yardımçı ola bilər. Yəni, ancaq öz korporativ maraqları naminə MSK-ya nümayəndə göndərirlər. Bununla da sıravi müsavatçıların da gözündən düşdülər”.

Q. Həsənquliyev bunu Müsavatın hökumətlə seçkiqabağı gizli danışıqlarının göstəricisi adlandırıb və iddia edib ki, “AXCP-Müsavat” bloku nümayəndələrinin parlamentə seçilməsinə təminat alıb: “Bunlar vaxtilə Ümid Partiyası ilə əməkdaşlıqdan məhz bu məsələyə görə imtina etmişdilər. Amma mən bu məsələdən o qədər də təəccüblənmədim, çünki dəfələrlə bu blokun təmsilçiləri hansısa siyasi prosesdə iştirak etməməklə bağlı öhdəlik götürüb, imza atıb, sonra da hörmətsiz formada həmin imzalarından imtina ediblər. Bunlar vaxtilə parlamentə getməmək barədə olan öhdəliklərini də belə prinsipsiz şəkildə pozmuşdular. Onların başqalarını ittiham etdikləri addımları özlərinin təkrarlamaları artıq mənim üçün gözlənilməz hal deyil”.

“Əgər MSK-dakı boş yerlərə Müsavat Partiyası nümayəndələrinin təyin olunması ilə bağlı məsələ parlamentdə müzakirə olunsa və səsverməyə çıxarılsa, biz bunun əleyhinə çıxacağıq. Çünki bu, parlamentdə azlıq təşkil edən partiyalara qarşı ədalətsiz davranışdır”. Bunu isə APA-ya açıqlamasında Böyük Quruluş Partiyasının (BQP) sədri, millət vəkili Fazil Mustafa deyib.

F. Mustafa bildirib ki, MSK-da ayrılmış yerlərdən imtina etmiş Müsavat Partiyasının birdən-birə həmin yerləri tələb etməsi heç bir məntiqə və prinsipə sığmır: “Çünki Müsavat Partiyası əvvəllər MSK-ya nümayəndə göndərdiyinə görə digər partiyaları ittiham etmişdi. İndi onların tərəfindən bu addım atılırsa, deməli, müəyyən dərəcədə hakimiyyətlə gizli danışıqların məhsulu kimi ortaya çıxacaq. Ona görə də bu məsələdə mövqeyimiz çox sərt olacaq”.

Müsavat Partiyası Mərkəz İcra Aparatının rəhbəri Arif Hacılı isə APA-ya açıqlamasında ittihamları rədd edib: “Bizim fəaliyyətimiz şəffafdır. MSK-dakı bu yerlər bizə hələ 2005-ci ildə təklif olunub, ona uyğun olaraq indi nümayəndələrimizi təqdim etmişik. Bu məsələdə həm hakimiyyətin, həm də Müsavat Partiyasının mövqeyi açıq olub. Ona görə də bu məsələnin hansısa gizli danışıqların nəticəsi olması barədə deyilənlər absurddur. Guya bizə deputat yeri verilməsi barədə deyilənlər də cəfəngiyyatdır. Müsavat Partiyası öz yerlərini özü alacaq, biz bu seçkilərə təkcə qanunverici hakimiyyət uğrunda mübarizə kimi yox, bütövlükdə ölkədə siyasi şəraitin dəyişdirilməsi imkanı kimi yanaşırıq. Bunun üçün də əlimizdən gələni edəcəyik”.

Qeyd edək ki, Müsavat Partiyası seçki komissiyalarında bu partiya üçün ayrılmış yerlərə nümayəndələr təyin etməklə bağlı qərarı Divanın bugünkü növbədənkənar iclasında qəbul edilib. İclasda Mərkəzi Seçki Komissiyasındakı iki yerə nümayəndələr müəyyənləşdirilib. Bunlar Müsavat Partiyası Seçki Departamentinin rəhbəri Gülağa Aslanlı və əvvəllər MSK-ya üzv olmuş bitərəf Ənvər Əliyevdir. Divanın qərarına əsasən, müxalifətdən olan MSK katibi vəzifəsinə də Gülağa Aslanlının namizədliyi irəli sürülüb. Partiya həmçinin bütün dairə seçki və məntəqə seçki komissiyalarının hər birinə nümayəndə təyin etmək niyyətindədir.

seçki