Daxili siyasət

Ana səhifə

Daxili siyasət

AMİP partiyanın 13 namizədinin seçki kampaniyasının dayandırılması haqqında qərar qəbul edib

30 sentyabr 2010 10:18 (UTC +04:00)

Bakı. Ramil Məmmədli-APA. Azərbaycan Milli İstiqlal Partiyasının (AMİP) rəhbərliyi Milli Məclisə keçiriləcək parlament seçkilərinə həsr olunmuş mətbuat konfransı keçirib.

APA-nın məlumatına görə, AMİP-in mətbuat katibi Əli Orucov deyib ki, partiya parlament seçkilərinə 70 namizədlə qatılıb, lakin seçki prosesinin ilk mərhələlərindən başlayaraq partiyanın namizədlərinə müəyyən təzyiqlər başlayıb.

AMİP-in seçki məsələləri üzrə katibi Rəşad Bayramov deyib ki, bölgələrdə olan seçki dairələrində rayon icra strukturları tərəfindən namizədliyini irəli sürmək üçün imza toplama kampaniyası aparan şəxslərə qarşı neqativ hallara yol verilir.

R. Bayramov baş verən qanunsuzluqlara qarşı partiyanın vahid mövqe sərgiləmək niyyətində olduğunu da söyləyib: “Artıq partiyanın 20 namizədi imza vərəqələrini və zəruri sənədləri DSK-lara təqdim etsələr də, onları qeydə almayıblar. AMİP artıq 22 saylı Nəsimi ikinci, 23 saylı Nəsimi-Səbail, 27 saylı Sabunçu ikinci, 28 saylı Sabunçu üçüncü, 29 saylı Səbail, 49 saylı Yevlax-Mingəçevir, 54 saylı Şabran-Siyəzən, 59 saylı Salyan, 66 saylı Biləsuvar, 73 saylı Lənkəran şəhər, 85 saylı Şamaxı, 114 saylı Şəki kənd birinci, 115 saylı Şəki kənd ikinci seçki dairələrində namizədliyini irəli sürən üzvlərinin seçki kampaniyasının dayandırılması haqqında qərar qəbul edib. Buna səbəb də namizədlərə və onların yaxınlarına olan təzyiqlərdir”.

R. Bayramov onu da qeyd edib ki, AMİP-dən olan namizədlərə təzyiqlər davam etdirilərsə, partiya bütün namizədlərini geri çağıracaq: “Bununla yanaşı AMİP kütləvi aksiyalara da start vermək niyyətindədir”.

R. Bayramov AMİP-in şəxsiyyət vəsiqələri ilə bağlı yaranan problemlərlə əlaqədar Mərkəzi Seçki Komissiyasına (MSK) müraciət edəcəyini də deyib: “Əksər seçicilərin şəxsiyyət vəsiqələrinin müddəti başa çatıb və bunlar dəyişdirilməlidir. Bu problemin qısa zamanda həlli üçün siyasi partiyaları da MSK-ya müraciət etməyə çağırırıq”.