Daxili siyasət

Ana səhifə

Daxili siyasət

BAXCP sədri: “Müsavatın MSK-ya iki namizəd təqdim etməsi qanunsuzluqdur”

04 oktyabr 2010 15:03 (UTC +04:00)

Bakı. Pərvin Abbasov-APA. “Müsavat Partiyasının MSK-ya iki nümayəndə göndərməsi hüquqi baxımdan doğru deyil. Çünki parlamentdə azlıqda qalan partiyaların Milli Məclis rəhbərliyi ilə o vaxt əldə etdiyi razılaşmaya görə Müsavat Partiyasına bir yer verməli idi. Hazırda iki yer ona görə boşdur ki, azlıqda qalan partiyalardan birinin təqdim etdiyi nümayəndə Rövşən İsmayılov Konstitusiya Məhkəməsinin hakimi təyin olunub. Bir yerə irəli sürüləcək bitərəf namizəd isə parlamentdə azlıqda qalan partiyalarla razılaşdırılmalıdır. Bu razılaşdırma da o vaxtdan baş tutmayıb, beləliklə də MSK-da üç yer boş qalıb. Bütün bunları nəzərə alaraq hesab edirik ki, Müsavatın MSK-ya iki nümayəndə göndərməsi doğru deyil və bu addımın hüquqi əsası yoxdur”. APA-nın xəbərinə görə, bunu jurnalistlərə açıqlamasında Bütöv Azərbaycan Xalq Cəbhəsi Partiyasının sədri, millət vəkili Qüdrət Həsənquliyev deyib.

Q. Həsənquliyev bildirib ki, BAXCP parlament seçkisinə qədər MSK-nın tam tərkibdə formalaşması tərəfdarıdır: “Hətta seçkiyə bir gün qalmış MSK-nın tam tərkibdə formalaşması baş tutsa, biz bunu alqışlayacağıq. Biz MSK-nın tam tərkibdə formalaşması üçün öz nümayəndəmizi də təqdim etmişik. Hesab edirik ki, BAXCP olaraq, parlamentdə azlıqda qalan partiya kimi bizim də MSK-da bir nümayəndəylə təmsil olunmaq haqqımız var. Parlamentdəki digər azlıqda qalan partiyalar da BAXCP-nin MSK-da bir nümayəndəylə iştirakına etiraz etmirlər. Təəssüf ki, Milli Məclis hələ də bu məsələni müzakirəyə çıxarmayıb”.

Q. Həsənquliyev deyib ki, onlar təqdim etdikləri BAXCP nümayəndəsi Mikayıl Rəhimovun MSK-ya üzv təyin olunacağına ümid edirlər.

Müsavat Mərkəzi İcra Aparatının rəhbəri Arif Hacılı isə APA-ya Q. Həsənquliyevin fikrinin yanlış olduğunu deyib. Onun sözlərinə görə, Müsavat Partiyasına MSK-da əvvəlcədən iki yer təklif olunub: “Milli Məclisin sədri Oqtay Əsədov da parlamentin son iclasında deyib ki, üç il öncə parlament rəhbərliyi tərəfindən Müsavat Partiyasına həmin iki yerə nümayəndə təyin etmək təklif olunub. Bu baxımdan da Qüdrət Həsənquliyevin dedikləri əsassızdır”.

MSK