Daxili siyasət

Ana səhifə

Daxili siyasət

Azərbaycan prezidenti Şərur rayonunun Yengicə kənd orta məktəbinin yeni binasının açılışında iştirak edib

05 oktyabr 2010 10:48 (UTC +04:00)

Bakı-APA. Azərbaycan prezidenti İlham Əliyev Şərur rayonunun Yengicə kənd orta məktəbinin yeni binasının açılışında iştirak edib. APA-nın “AzərTAC”a istinadən yaydığı məlumata görə, prezident İlham Əliyev açılışı bildirən lenti kəsib və bina ilə yaxından tanış olub.
Məktəbin 130 ildən çox yaşı olan köhnə binası sonuncu dəfə 1986-cı ildə təmir edilib. Uzun müddət yararsız vəziyyətdə olan təhsil ocağı üçün yeni binanın tikintisi uğurla başa çatıb. Üçmərtəbəli yeni binada hazırda 306 şagird təhsil alır. Onların təlim və tərbiyəsi ilə 45 müəllim məşğul olur. Yeni binada 568 şagird yeri var. Otaqlar və fənn kabinetləri müasir standartlara cavab verən dərs ləvazimatları və avadanlığı ilə təchiz olunub. Səkkiz min nüsxəyə yaxın ədəbiyyat fondu olan kitabxanada Heydər Əliyev guşəsi yaradılıb. Kompüter otaqlarında şagirdlərin informasiya texnologiyalarının sirlərinə yiyələnmələri üçün bütün texniki imkanlar mövcuddur. Sinif otaqlarının hər birində internetə qoşulmuş 19 kompüter qoyulub. Məktəbdə dərslərin elektron formatda keçilməsi üçün elektron lövhə ilə təmin edilmiş iki kabinet fəaliyyət göstərir. Təhsil ocağında zəruri materiallarla təchiz olunmuş hərbi kabinet də var. Müxtəlif idman qurğularının quraşdırıldığı zalda mini futbol, basketbol, voleybol yarışları keçirmək mümkündür. Üç korpusdan ibarət olan məktəbdə təlim-tədris prosesinin yüksək səviyyədə aparılması üçün zəruri infrastruktur yaradılıb.
Dövlət başçısı yaradılmış şəraiti yüksək qiymətləndirib, kollektivə uğurlar arzulayıb. Sakinlər göstərilən diqqət və qayğıya görə prezident İlham Əliyevə minnətdarlıq ediblər.