Daxili siyasət

Ana səhifə

Daxili siyasət

“Məhkəmələr və hakimlər haqqında” qanuna əlavə və dəyişikliklər təsdiqlənib

08 oktyabr 2010 11:33 (UTC +04:00)

Bakı. Rəşad Süleymanov – APA. Azərbaycan Milli Məclisi “Məhkəmələr və hakimlər haqqında” qanuna əlavə və dəyişiklikləri təsdiqləyib. APA-nın məlumatına görə, Milli Məclisin Hüquq siyasəti və dövlət quruculuğu komitəsinin sədri Əli Hüseynov bildirib ki, dəyişikliklər hakimlərin sosial təminatının yaxşılaşdırılmasına yönəlib.

Qanuna edilmiş dəyişikliklərlə səlahiyyətlərin yerinə yetirilməsi ilə bağlı xərclərin ödənilməsi üçün Azərbaycan Respublikası Ali Məhkəməsinin hakimlərinə vəzifə maaşının 25%-i miqdarında, apellyasiya instansiyası məhkəmələrinin hakimlərinə vəzifə maaşının 20%-i miqdarında, birinci instansiya məhkəmələrinin hakimlərinə vəzifə maaşlarının 15%-i miqdarında vergilərdən azad olunan aylıq pul təminatı veriləcək.

Bundan başqa, ilk dəfə hakim vəzifəsinə təyin olunan şəxslərə hakimlik fəaliyyətinin birinci ilində bir dəfə aylıq vəzifə maaşının iki misli, sonrakı dörd il ərzində isə ildə bir dəfə aylıq vəzifə maaşı məbləğində birdəfəlik yardım ödəniləcək.

Qeyd edək ki, Milli Məclis həmçinin “Prokurorluq haqqında”, “Prokurorluq orqanlarında qulluq keçmə haqqında” və “Ədliyyə orqanlarında qulluq keçmə haqqında” qanunlara da əlavə və dəyişikliklər edib. Dəyişikliklərə əsasən ədliyyə orqanlarının əməkdaşları ədliyyə sisteminin inkişafı sahəsində göstərdikləri səmərəli əməkdaşlığa, verdikləri töhfələrə görə Azərbaycanın və xarici ölkələrin dövlət və digər qurumlarının, habelə beynəlxalq təşkilatların fəxri fərman və xatirə nişanı ilə təltif edilə bilərlər.