Daxili siyasət

Ana səhifə

Daxili siyasət

Azərbaycan prezidenti Yevlax şəhərində bir sıra obyektlərin açılış mərasimində iştirak edib

14 oktyabr 2010 16:25 (UTC +04:00)

APA-nın “AzərTAC”a istinadən yaydığı məlumata görə, dövlət başçısı bu gün Yevlaxda 1 nömrəli orta məktəbin yeni binasının açılışında iştirak edib. Prezident İlham Əliyev məktəbin yeni binasının istifadəyə verilməsi münasibətilə onları təbrik edib, uğurlar arzulayıb. Dövlət başçısı rəmzi açılışı bildirən lenti kəsib, binada yaradılmış şəraitlə tanış olub. Binanın tikintisinə 2009-cu ilin iyul ayında başlanıb. Binanın ümumi sahəsi 1192,2 kvadratmetrdir. Birinci mərtəbədə direktor, müəllimlər, qəbul, təsərrüfat otaqları, qarderob və iki sinif otağı, kitabxana, idman zalı, tibb məntəqəsi yerləşir. İkinci mərtəbə 9 sinif və 2 kompüter otağı var. Üçüncü mərtəbə isə kimya, fizika kabinetləri, 2 laboratoriya otağı, 7 sinif otağı, təsərrüfat otağından və akt zalından ibarət. Prezident İlham Əliyev yaradılmış şəraitdən razılığını bildirib.

Prezident İlham Əliyev Yevlaxa səfəri çərçivəsində “Azərtoxum” MMC toxumçuluq müəssisəsinin açılışında iştirak edib. Müəssisədə yaradılmış şəraitlə tanış olan prezident İlham Əliyevə məlumat verilib ki, “Azərtoxum” MMC toxumçuluq müəssisəsinin tikintisi üçün 7 hektar torpaq sahəsi ayrılıb. Tikintisinə 2009-cu ilin iyununda başlanmış müəssisə 80 tonluq qapandan, tutumları 1000, 1500 və 2500 ton olan 12 anbardan, toxum laboratoriyasından, təmir sexindən, yanacaqdoldurma məntəqəsindən və evlərdən ibarətdir. Müəssisədə 80 nəfər daimi işlə təmin olunub. Dövlət başçısı müəssisənin işə düşməsini bildirən düyməni basıb, istehsal prosesi ilə tanış oldu, hazır məhsulların sərgisinə baxıb.

Prezident İlham Əliyev Yevlax şəhərinə səfəri çərçivəsində Kür çayının sahilində bulvar-hotel kompleksində tikinti işlərinin gedişi ilə tanış olub. Dövlət başçısına məlumat verilib ki, bulvar-hotel kompleksi üçün 10 hektar torpaq sahəsi ayrılmışdır. Hotelin tikinti sahəsi 2156 kvadratmetrdir. Beşmərtəbəli hoteldə 44 nömrə, restoran, bar, idman zalı, mətbəx, hovuz, ofis otaqları və digər yardımçı otaqlar olacaq. Prezident İlham Əliyev və xanımı Mehriban Əliyeva hotelin maketi, otaqların dizayn elementlərinin fotoeskizləri və işçi layihə ilə tanış oldular. Kür çayının sahilində 1,5 kilometrlik bulvarın uzunluğunun 4 kilometrə çatdırılması, burada istirahət və əyləncə üçün hər cür şəraitin yaradılması nəzərdə tutulur. Hazırda ərazidə yaşıllıq işləri aparılır. Dövlət başçısı Heydər Əliyevin 2002-ci il sentyabrın 13-də Kür sahilindəki bu sahədə olmasının qeyd edildiyi qaya parçasına baxıb. Prezident İlham Əliyevə “Qırmızı kitab”a daxil edilmiş Kür çayının sahilindəki uzunömürlü qovaq ağacı haqqında da məlumat verilib. Dövlət başçısı və xanımı Mehriban Əliyeva ağacın qarşısında xatirə şəkli çəkdiriblər. Kompleksdə aparılan abadlıq və quruculuq işlərindən razılığını bildirən Prezident İlham Əliyev tapşırıq və tövsiyələrini verib.