Daxili siyasət

Ana səhifə

Daxili siyasət

Əli Hüseynov: “Viza rejimi ilə bağlı yeni qaydaların tətbiqinin seçki prosesi ilə əlaqələndirilməsi məntiqsizlikdir” - MÜSAHİBƏ

Əli Hüseynov: “Viza rejimi ilə bağlı yeni qaydaların tətbiqinin seçki prosesi ilə əlaqələndirilməsi məntiqsizlikdir” - <font color=red>MÜSAHİBƏ</font>

20 oktyabr 2010 15:43 (UTC +04:00)

- Əli müəllim, Azərbaycana gələn xaricilərin harada və hansı qaydada viza almaları ilə bağlı son günlər yaranmış problemlər nə ilə bağlıdır?

- Qeyd etməliyəm ki, bu məsələ müxalifət mətbuatında süni surətdə və provakasion xarakterli yazılarla şişirdilib. Belə fikir müəllifləri prezident fərmanının mütərəqqi mahiyyətindən ya bixəbərdirlər, ya da bilərəkdən yanlış fikirlər yayırlar.

- Bəzi insanlar tətbiq olunan yeni qaydaları seçki ilə əlaqələndirirlər. Fərmanın əsl mahiyyətini izah edə bilərsiniz?

- İlk növbədə qeyd edim ki, dövlət başçısı tərəfindən “Azərbaycan Respublikasına gələn əcnəbilərə və vətəndaşlığı olmayan şəxslərə vizaların rəsmiləşdirilməsi ilə bağlı bəzi məsələlər haqqında” Fərman sentyabrın 13-də imzalanıb və yeni qaydaların tətbiq olunacağı artıq bu zamandan məlum idi. Yəni, indi bu qaydaların hansısa bir siyasi proseslə, daha dəqiqi seçki ilə əlaqələndirilməsi məntiqsizlikdir.

Hazırda Azərbaycan regionun ən inkişaf etmiş ölkəsidir. Azərbaycan iqtisadi proyektlərin, beynəlxalq ictimai-siyasi tədbirlərin ən çox keçirildiyi bir ölkədir. Məhz buna görə də Azərbaycana gələn rəsmi şəxslərin, iş adamlarının, turistlərin sayı ilbəil artmaqdadır. Təsadüfi deyil ki, miqrasiya sahəsində dövlət siyasətinin həyata keçirilməsi ilə bağlı son illər kompleks tədbirlər həyata keçirilib, Dövlət Miqrasiya Xidməti yaradılıb, vahid miqrasiya informasiya sistemi formalaşıb. Bu fərmanın məqsədi ilk növbədə miqrasiya idarəetmə sistemində dünyanın əksər inkişaf etmiş və təhlükəsizliyinə önəm verən ölkələrdə mövcud olan qaydaların tətbiqidir. Eyni zamanda, fərman 24 iyun 2008-ci il tarixdə Milli Məclis tərəfindən qəbul edilmiş “Azərbaycan Respublikasının bəzi qanunvericilik aktlarına əlavələr və dəyişikliklər edilməsi barədə” qanunun tətbiqi ilə bağlıdır. Bu qanunla ”Ölkədən getmək, ölkəyə gəlmək və pasportlar haqqında”, “Əcnəbilərin və vətəndaşlığı olmayan şəxslərin hüquqi vəziyyəti haqqında”, “İmmiqrasiya haqqında” və bir sıra digər qanunlara əhəmiyyətli dəyişikliklər edilib. Bununla bir daha vurğulamaq istəyirəm ki, yeni qaydalar son illərdə miqrasiya sahəsində apardığımız həm qanunvericilik, həm də praktik tətbiqinin məntiqi nəticəsidir.

Fərmanın qüvvəyə mindiyi 15 oktyabr və sonrakı bir neçə gündə yaranmış texniki problemlər isə yeni qaydalara, yeni proseduralara uyğunlaşmaqla bağlı olub. Artıq bu məsələlər müvafiq orqanların çevikliyi nəticəsində həllini tapıb.

- Nə üçün bu qaydalar əvvəllər tətbiq edilməyib?

- Mən artıq qeyd etdim ki, vahid miqrasiya idarəetmə sistemi ancaq son zamanlar yaradılıb. Eyni zamanda, məhz son illər Azərbaycanın bir çox xarici ölkələrdə də yeni səfirlikləri və konsulluqları açılıb. Hazırda dünyanın müxtəlif regionlarında 59 səfirlik və 12 konsulluğumuz fəaliyyət göstərir. Bunların çoxu bir yox, bir neçə ölkə ilə əlaqələrimizə cavabdehdirlər. Bu yaxınlarda yeni səfirliklərin də açılacağı gözlənilir. Beləliklə, dünyanın bütün regionları ilə Azərbaycanın diplomatik əlaqələri mövcuddur. Bu səfirlik və konsulluqlar yaxşı maddi-texniki təminata malikdirlər və orada peşəkar diplomatlar çalışırlar. Deməli, vizaların rəsmiləşdirilməsi ilə bağlı yeni proseduraların tətbiqində heç bir problem olmayacaq. Bir sözlə, yeni proseduraların tətbiqi üçün müvafiq strukturlar və mexanizmlər artıq mövcuddur.

- Bəs onda belə bir ajiotaj nədən yaranıb?

- Düzü, bu məsələ bizi də təəccübləndirdi. Məgər hər hansı bir Azərbaycan vətəndaşı hər hansı bir Avropa ölkəsinə həmin ölkənin aeroportunda viza almaqla daxil ola bilərmi? Bunu heç Azərbaycanda diplomatik pasporta malik olan şəxslər də edə bilməzlər. Ümumi qayda belədir ki, öncədən səfirlik və konsulluqlara müraciət olunur, viza əldə olunur və ancaq bundan sonra xarici ölkəyə getmək mümkündür. İndi Azərbaycan qanunvericiliyi də bir çox ölkələrdə mövcud olan bu normaları tətbiq edib və burda təəccüblü heç nə yoxdur. Əlbəttə biz dünyanın inkişaf etmiş ölkələri ilə qarşılıqlı vizasız gediş-gəlişdə maraqlıyıq. Təsadüfi deyil ki, son dövrdə Avropanın bir sıra ölkələri ilə diplomatik və xidməti pasport daşıyıcıları üçün vizasız gediş-gəlişlə bağlı müqavilələr imzalanıb və parlamentdə ratifikasiya olunub. Bu siyasətimiz gələcəkdə də davam etdiriləcək.