Daxili siyasət

Ana səhifə

Daxili siyasət

Sərdar Cəlaloğlu: “İsa Qəmbərin əsas məqsədi Ümid Partiyası və İqbal Ağazadəni müxalifətin birgə prosesinə buraxmamaqdır”

24 noyabr 2010 10:09 (UTC +04:00)

Bakı. Ramil Məmmədli - APA. “Azərbaycan müxalifətin uğursuzluqlarının indiki vəziyyətdə səbəbi siyasi mədəniyyətin aşağı olmasındadır”. Bunu APA-ya açıqlamasında Azərbaycan Demokrat Partiyasının (ADP) sədri Sərdar Cəlaloğlu deyib. Parlament seçkisinin nəticələrindən narazı qalan müxalifət partiyalarının forumu ilə bağlı məsələyə münasibət bildirən S. Cəlaloğlu bildirib ki, fərdi qaydada həmin toplantıya dəvət edilib: “Noyabrın 8-də isə mən, Əli Kərimli, İsa Qəmbər və Pənah Hüseyn birlikdə seçkidən sonrakı müxalifətin atacağı addımlarla bağlı müzakirə apardıq. Orada bildirdim ki, seçkidə iştirak edən, o cümlədən bu kampaniyanın nəticələrini qəbul etməyən blok və partiyaların birgə yığıncağı keçirilməlidir. İsa Qəmbər isə təklif elədi ki, yalnız parlamentə buraxılmayan partiyaların mövqeyini ifadə edən prosesi başlatmaq lazımdır. Onun bu təkidində əsas məqsədi isə Ümid Partiyasını və onun sədri İqbal Ağazadəni müxalifətin bu birgə prosesinə buraxmamaqdır”.

S. Cəlaloğlu qeyd olunan formatın dəyişilməsini xahiş etdiyini də söyləyib: “Məsələn, indi “xalq parlamenti”nın yaradılması ilə bağlı təşəbbüs var. Bu kimin təklifidir? Bu nə dərəcədə səmimi qurum olacaq? Axı, bu qurumu yaratmaq istəyən adamların təşəbbüsü ilə seçkidən əvvəl müxalifət 10 yerə parçalanmışdı. Həmin vaxt ittiham etdikləri adamlar gəlib yeni məclislərində oturub. Necə olur ki, bəzi adamlara qarşı seçkidən əvvəl irəli sürülən ittihamlar bir kənara qoyulur, bəzilərinə qarşı isə həmin ittihamlar davam etdirilir. Elə hesab edirəm ki, bu, yanlış yoldur və heç bir perspektivi yoxdur”.

ADP sədri bu təşəbbüsün həm hüquqi, həm mənəvi cəhətdən doğru olmadığını da bildirib: “Dediklərimi nəzərə alıb həmin tədbirdə iştirak etməmişəm. “Qarabağ” bloku tam şəkildə dəvət edilməyəcəksə, ADP həmin formatda müzakirələrə qatılmayacaq. Demokratiya tələb edir ki, qərarları icra edənlər versin. İki nəfər oturub qərar verəcək, bizi də bunun icrasına dəvət edəcək. Guya biz Müsavat Partiyasının rayon təşkilatıyıq. Bu cür ənənələr Azərbaycan müxalifətini onsuz da pis günə qoyub. Bundan sonra da belə siyasətin davam etdirilməsi Azərbaycana yaxşı heç nə vəd etmir. Biz artıq siyasi münasibətləri dəyişdirməyi bacarmalı, yeni siyasi ənənələrin gəlməsi üçün siyasi mədəniyyət formalaşdırmalıyıq”.

Müsavat Partiyasının başqanının müavini Tofiq Yaqublu isə APA-ya açıqlamasında S. Cəlaloğlunun dediklərini düzgün hesab etmədiyini bildirib: “Müxalifətin hazırkı formatı daha məqsədəuyğundur. Sərdar Cəlaloğlu nəyin bahasına olursa-olsun, İqbal Ağazadəyə müxalifətçi statusu verilməsinə çalışır. Bu seçkilərdə yalnız İqbal Ağazadə deputat mandatı alıb. Xeyir ola? Əgər o doğurdan da müxalifətçidirsə, azad və ədalətli seçkilər uğrunda mübarizə aparırsa, niyə qeyri-qanuni verilən mandatı qəbul edərək parlamentə gedir? İqbal Ağazadə səmimidirsə, onun üçün ayrılan deputat yerindən imtina etsin. Bizim mövqeyimiz tamamilə haqlıdır. İqbal Ağazadə hakimiyyətinin yanındadırsa, müxalifət liderləri buna nə etməlidir?”

seçki