Daxili siyasət

Ana səhifə

Daxili siyasət

Bahar Muradova: “Demokratiyanın dərəcəsini ölçmək üçün hər hansı bir cihaz kəşf olunmayıb”

25 noyabr 2010 13:32 (UTC +04:00)

Bakı. Pərvin Abbasov – APA. “7 noyabrda keçirilmiş parlament seçkiləri ilə bağlı MSK-ya edilən şikayətlərin araşdırılması prosesi bir daha sübut etdi ki, seçki keçirilən dairələrin heç birində nəticələri şübhə altına ala biləcək hər hansı bir addıma yol verilməyib”. APA-nın xəbərinə görə, bu fikirləri YAP-ın rəsmi saytına müsahibəsində Milli Məclisin sədr müavini, Azərbaycanın ATƏT Parlament Assambleyasında nümayəndə heyətinin rəhbəri Bahar Muradova deyib. O, baş verən bəzi qanun pozuntularının öz qanuni qiymətini aldığını və bir sıra məntəqələrdə seçkinin nəticələrinin ləğv olunduğunu xatırladıb: “Yəqin ki, bu məsələ ilə bağlı cavabdehlik daşıyan insanlar da məsuliyyətlərini dərk edirlər. Bu seçkidə iştirak edib uğur qazanmayanların məhdud sayda bir qismi fərqli düşüncədə ola bilər. Onlar düşünə bilərlər ki, məğlubiyyətləri fərqli bir fəaliyyətin nəticəsidir. Amma bu düşüncə sahibləri hər zaman olduqları kimi bu dəfə də yanlış yoldadırlar. Azərbaycanda demokratik, azad cəmiyyət mövcuddur. Hər bir kəs öz mövqeyini istədiyi formada ifadə edə bilər və ifadə azadlığı hər kəsə verilib. Bu səbəbdən belə fərqli düşüncələrin olmasını normal qəbul edirəm. Amma hesab edirəm ki, bu, parlamentin bundan sonrakı fəaliyyətinə kölgə sala biləcək hər hansı bir təsirə malik deyil. Kimlərsə, məsələnin qanuni yolla araşdırılmasını istəyirsə, qarşıda qanunla araşdırma aparacaq instansiyalar var və buyurub həmin instansiyalara müraciətlər edə bilərlər”.

B. Muradova ATƏT-in seçki ilə bağlı ilkin rəyinin bəzi məqamları ilə razılaşa bilmədiyini də vurğulayıb: “Xaricdən seçkini izləməyə gələn müşahidə missiyalarının ilkin hesabatlarında bir sıra məqamlarda üst-üstə düşən oxşar cəhətlər çoxdur. Bu da faktdır. Azərbaycanda seçkiyə hazırlıq prosesinə cavabdeh qurumlar olduqca yüksək səviyyədə iş görüblər və bu fakt hesabatlarda qeyd olunub. Burada istər texniki, istər təminat, istərsə də digər məsələlər öz əksini tapıb. Debatların təşkili, bütün namizədlərin bərabər mübarizə aparmaları üçün şəraitin yaradılması, pulsuz efir vaxtının ayrılması, seçkini müşahidə etmək üçün insanlara yaradılan şərait bu seçkilərin yüksək səviyyədə təşkilindən xəbər verir. Amma bəzi hesabatlarda belə məqamlar da yer alıb ki, bu seçkilər guya Azərbaycanın demokratiyanın inkişafı üçün qaneedici səviyyədə olmayıb. Bilirsinizmi, demokratiyanın dərəcəsini ölçmək üçün hər hansı bir cihaz kəşf olunmayıb və ya bu dərəcə vahidi elan olunmayıb. Müşahidə missiyalarının seçkinin obyektiv şəkildə dəyərləndirdiyi hesabatlar daha çoxdur. Əlbəttə biz, Azərbaycanda keçirilən seçkilərə bəzi dairələrin subyektiv yanaşmasının hər dəfə şahid olmuşuq. Bununla bağlı Azərbaycan rəsmilərinin də mövqeləri səslənib. Xüsusilə, ATƏT-in Demokratik Təsisatlar və İnsan Haqları Bürosunun uzunmüddətli missiyanın mövqeyində bu cür məqamlar yer almışdı. Qeyd edim ki, ATƏT-in ayrı-ayrı təsisatı olmaqla Parlament Assambleyası ilə Demokratik Təsisatlar və İnsan Haqları Bürosunun hesabatlarında kəskin fərq hər zaman özünü büruzə verib. Bu tək Azərbaycandakı seçkilərdə yox, dünyanın digər ölkələrində keçirilən seçkilərə münasibətdə də özünü göstərir. Uzunmüddətli missiya həqiqətən də hansısa bir mənbədən aldığı göstərişləri icra etmək yönümündə fikirlərini ifadə edir. Ona görə də, belə hesabatlar ciddi qəbul olunmur”.