Daxili siyasət

Ana səhifə

Daxili siyasət

Prezident İlham Əliyev Şuşa şəhəri 1 nömrəli orta məktəbinin kollektivini yubiley münasibətilə təbrik edib

06 dekabr 2010 16:38 (UTC +04:00)

Prezidentin mətbuat xidmətindən APA-ya verilən məlumata görə, təbrikdə qeyd olunub ki, məktəb milli təhsil sisteminin inkişafına və maarif-mədəniyyət tariximizə dəyərli töhfələr verib: “Ədəbi-ictimai fikrimizin bir çox görkəmli simalarının təhsil aldıqları bu tədris müəssisəsi yarandığı vaxtdan bəri ölkəmizdə mütərəqqi fikirli yeni ziyalılar nəslinin və milli kadrların yetişməsində, mədəni-maarifçilik hərəkatının geniş vüsət qazanmasında təqdirəlayiq xidmətlər göstərib”.

Təbrikdə qeyd olunub ki, Ermənistan-Azərbaycan, Dağlıq Qarabağ münaqişəsi zamanı Ermənistanın apardığı etnik təmizləmə siyasəti nəticəsində qədim Şuşada iqtisadi və sosial infrastruktur büsbütün dağıdılıb: “Şuşa şəhəri 1 nömrəli orta məktəb 1992-ci ildən Bakı şəhərində məskunlaşmaq məcburiyyətində qalıb. Məktəbiniz ötən illərdə özünün pedaqoji ənənələrini qoruyub yaşatmaq üçün böyük əmək sərf edib. İnanıram ki, məktəbin müəllim kollektivi gənc nəslin mənəvi saflığı, bilikləri lazımınca mənimsəməsi və yurdumuzun layiqli övladları kimi yetişdirilməsi naminə bundan sonra da var qüvvə ilə çalışacaq”.
Dövlət başçısı təhsil sahəsində xidmətlərinə görə Şuşa şəhəri 1 nömrəli orta məktəbin müəllimi Sevil Həsən qızı Babayevaya “Əməkdar Müəllim” fəxri adı verilməsi haqqında sərəncam da imzalayıb.

Prezident İlham Əliyevin başqa bir sərəncamı ilə təhsil sahəsində xidmətlərinə görə Şuşa şəhəri 1 nömrəli orta məktəbin müəllimləri Əbdüləzimova Gülşən Qafar qızı və Kərimova Bahar Hüseyn qızı “Tərəqqi” medalı ilə təltif ediliblər.

Prezident-Əliyev