Daxili siyasət

Ana səhifə

Daxili siyasət

Mustafa Hacıbəyli: “Birləşmiş partiyanın sədri postunda İsa Qəmbəri görürəm”

08 dekabr 2010 14:08 (UTC +04:00)

Bakı. Pərvin Abbasov – APA. “Müsavat Partiyasında fövqəladə vəziyyət yaranmayıb. Partiyada müxtəlif istiqamətlərdə fəaliyyət qurulur, növbəti il üçün fəaliyyət proqramı hazırlanır, qurultayla bağlı hazırlıqlara start verilib. Təbii ki, demokratik düşərgədə olan qüvvələrin təmərküzləşməsi ilə bağlı müzakirələr gedir, ancaq yekun qərar yoxdur”. Bunu APA-ya açıqlamasında Müsavat Partiyasının Məclis üzvü Mustafa Hacıbəyli deyib.

Məclis üzvü Sülhəddin Əkbər və İbrahim İbrahimlinin istefalarının sıradan bir hadisə olmadığını bildirib: “Biz Məclis sədrinin və Divan üzvünün partiyadan getməsinə təəssüflənirik. Eyni zamanda, subyektiv olaraq deyirəm ki, əslində bu iki nəfərin partiyadan getməsi sonuncu parlament seçkilərinin nəticələrinin doğurduğu fəsadlardan biridir, bunun başqa proseslərə aidiyyatı yoxdur”.

M. Hacıbəyli deyib ki, İbrahim İbrahimli Müsavat Partiyasının MSK-dakı təmsilçisi olmaq istəyib, buna görə də partiyada ona etimadsızlıq olduğunu bildirərək istefa verib: “ Sülhəddin bəy isə AXCP ilə birləşmənin tərəfdarının azlığından şikayətlənib. Hələ ki, birləşmək məsələsi ilə bağlı yekun qərar olmayıb. Yekun qərar yoxdursa, bu, istefa üçün əsas ola bilməzdi. Ən azı onlar yekun qərarı gözləməli idilər. Ümumiyyətlə, birləşmə mövzusunda müzakirələr getdiyi dövrdə istefa vermək birliyə xeyir vermir, əksinə, xələl gətirir. Bu, münasibətlərin yaxşılaşmasına yox, soyumasına xidmət edir”.

M. Hacıbəyli AXCP və Müsavatın birləşməsinin tərəfdarıdır. O, birləşmiş partiyanın sədri postunda müsavatçıların müsavatçını, cəbhəçilərin isə cəbhəçini görmək istəməsinin təbii olduğunu deyib: Mən birləşmiş partiyanın sədri postunda İsa Qəmbəri görürəm. Əlbəttə, hər bir cəbhəçi birləşmiş partiyanın sədri kimi Əli Kərimlini görmək istəyirsə, hər bir müsavatçının İsa Qəmbərin sədr olmasını istəməsi təbiidir”.

Fuad Qəhrəmanlının APA-ya açıqlamasında birləşmiş partiyada Əli Kərimlinin sədr olması ideyasının AXCP-nin deyil, Müsavat Partiyasının funksionerləri tərəfindən gündəmə gətirilməsi ilə bağlı dediklərinə münasibət bildirən M. Hacıbəyli “bu fikri hansı funksionerlər harada səsləndirib, harada səsləndirib, bunu Fuad bəy daha yaxşı bilər. Müzakirələr gedir, bu müzakirələrdə müxtəlif fikirlər ola bilər, buna da təbii yanaşmaq lazımdır” deyib.

M. Hacıbəyli İsa Qəmbərin başqanlıqda qalmasını istəyir: “İsa bəyin təkcə Müsavatın başqanı kimi yox, demokratik düşərgənin vahid lideri kim fəaliyyətini davam etdirməsini zəruri sayıram”.