Daxili siyasət

Ana səhifə

Daxili siyasət

Parlament seçkilərinin nəticələrindən narazı qalan sabiq deputatlığa namizədlərin sayca ikinci forumu keçirilib

14 dekabr 2010 13:42 (UTC +04:00)

Bakı. Pərvin Abbasov - APA. Bu gün Müsavat Partiyasının qərargahında 7 noyabr parlament seçkilərinin nəticələrindən narazı qalan sabiq deputatlığa namizədlərin sayca ikinci forumu keçirilib. APA-nın məlumatına görə, foruma Müsavat partiyasının başqanı İsa Qəmbər sədrlik edib. Tədbirdə AXCP sədri Əli Kərimli, sabiq millət vəkili Pənah Hüseyn, deputatlığa namizədliklərini müstəqil şəkildə irəli sürmüş şəxslər çıxış ediblər.

Ə. Kərimli forum iştirakçılarını özündə birləşdirən bir hərəkat yaratmağı təklif edib: “Əgər biz buna nail ola bilsək, gələcəkdə daha böyük layihələr gerçəkləşdirmiş olarıq. Məsələn, 40 min imza toplayıb qanunvericilik təşəbbüsü ilə çıxış edə, hətta 300 min imza toplayıb referendum keçirilməsinə nail ola bilərik”.

Çıxış edən sabiq millət vəkili Pənah Hüseyn Xalq Məclisi yaratmaq ideyasını növbəti dəfə səsləndirib: “Bu simvolik qurumu İctimai Palata, yaxud Senat adlandırmaq olar. Bu təklifi keçmiş “Müsavat” deputat qrupunun üzvləri və digər şəxslər də dəstəkləyir. Biz istənilən halda oyun müstəvisini dəyişməliyik. Çünki indiki müstəvidə oyunu uduzmuşuq”.

Daha sonra P. Hüseyn Xalq Məclisinin yaradılması ilə bağlı hazırladığı layihənin mətnini səsləndirib.

Forumda çıxış edən AXCP sədrinin müavini Nurəddin Məmmədlinin isə P. Hüseynin təklifinə münasibəti birmənalı olmayıb: “Belə bir təcrübə başqa ölkələrdə də var. Ancaq məsələ burasındadır ki, həmin Senata üzvləri necə seçəcəyik? Məsələn, Qırğızıstan modelində belə bir xalq məclisində hər bir tayfadan müəyyənləşdirilmiş bir nəfər nümayəndə iştirak edir”.

Tədbirdə forum iştirakçıları adından Avropa Şurası Parlament Assambleyasına müraciət ünvanlanması barədə qərar qəbul olunub.

Qeyd edək ki, növbəti analoji forumun dekabr ayının sonunadək keçirilməsi planlaşdırılır.