Daxili siyasət

Ana səhifə

Daxili siyasət

BAXCP İdarə Heyətinin növbəti iclası keçirilib

20 dekabr 2010 12:30 (UTC +04:00)

Bakı. Pərvin Abbasov – APA. Bu gün Bütöv Azərbaycan Xalq Cəbhəsi Partiyası (BAXCP) İdarə Heyətinin növbəti iclası keçirilib. Partiyanın mətbuat xidmətindən APA-ya verilən məlumata görə, iclasda qərarların icrası, ictimai-siyasi vəziyyət, eləcə də ölkədəki sosial-iqtisadi problemlərlə bağlı məsələlər müzakirə olunub.

Sosial problemlər müzakirə edilərkən əhalinin elektrik enerjisi, su və qazla təminatının narahatlıq doğurduğu qeyd edilib. Bildirilib ki, xüsusilə rayon və kəndlərdə bu sahədə təminat acınacaqlı vəziyyətdədir: “Qış aylarında əksər ucqar kəndlərdə əsaslı səbəblər olmadan işıqlar ara-sıra söndürülür, "mavi yanacaq" isə ümumiyyətlə yoxdur”.

Bunlara yanaşı, İdarə Heyətinin üzvləri qeyd ediblər ki, yeni binaların sənədləşdirilməsi tam aparılmadığından insanlar mülkiyyət hüquqlarını təsdiq edən sənəd ala bilmirlər: Sənədlər olmadığından hətta həmin evlərə qeydiyyata düşmək mümkün deyil. Evini satıb burada mənzil alanlar yaşayış yeri üzrə heç bir yerdə qeydiyyatda deyillər. Belə vəziyyət isə çox ciddi hüquqi problemlər yaradır. Hətta hərbi xidmət yaşı çatmış gənclər də əsgərliyə gedə bilmirlər.

Bütün bunları nəzərə alan BAXCP hökuməti bu sahədə nizam-intizam yaratmağa çağırıb.