Daxili siyasət

Ana səhifə

Daxili siyasət

Əli Əliyev: “İnsan naminə” seçki blokunda təmsil olunan partiyalarla bundan sonrakı münasibətlərimizə aydınlıq gətirilməlidir”

20 dekabr 2010 13:01 (UTC +04:00)

Bakı. Ramil Məmmədli - APA. ““İnsan naminə” seçki blokunda təmsil olunan partiyalarla bundan sonrakı münasibətlərimizə aydınlıq gətirilməlidir”. Bunu APA-ya açıqlamasında blokun həmtəsisçisi, Vətəndaş və İnkişaf Partiyasının (VİP) sədri Əli Əliyev deyib.

Ə. Əliyev bildirib ki, “İnsan naminə” seçki bloku faktiki fəaliyyətini dayandırıb. Ancaq bunun rəsmiləşdirilməsi hələ baş verməyib: “Yəqin ki, bu ayın sonuna qədər müəyyən müzakirələrdən sonra növbəti mərhələdəki münasibətlərimizə aydınlıq gətirəcəyik”.

Partiya sədri seçki blokunun siyasi birliyə çevrilməsi ilə bağlı müzakirənin aparılmadığını da söyləyib: “Təbii ki, seçki prosesində müttəfiqlərimizi münasibətlərimizin seçkidən sonrakı mərhələsi maraqlandırır. Növbəti mərhələdə olacaq siyasi addımlara etinasız qala bilmərik. Ona görə də müttəfiqlik edəcəyimiz təşkilatlar sırasında seçki blokundakı müttəfiqlərimizin olmasını istərdik. Ola bilər ki, münasibətlərimiz hansısa başqa formada davam etsin. Əlbəttə bunların hamısına müzakirələrdən sonra aydınlıq gələcək. Müzakirələrin konkret vaxtı müəyyənləşməyib və doğrusu belə bir zərurət də olmayıb”.

7 noyabrda keçirilən parlament seçkisinin nəticələrindən narazı qalan sabiq deputatlığa namizədlərin forumuna dəvətlə bağlı məsələyə də münasibət bildirən Ə. Əliyev deyib ki, həmin siyasi qurumlardan dəvət gözləməyib: “Öz adımdan deyə bilərəm ki, keçilmiş cığırla getməyi məqsədəuyğun saymıram. Bir də orada təmsil olunan siyasi qurumları yaxşı tanıdığımdan deyə bilərəm ki, nəticə verməmiş yox, yeni nəticə verə biləcək yolla getməyi məqsədəuyğun sayırıq. Başqalarının da addımlarını nə müzakirə, nə də təlqin etmək niyyətimiz var. Biz onlardan dəvət də gözləmirdik. Belə də ki, özümüz siyasi proses, hadisə yaradıb, dəvət edirik. Görüntü xətrinə addımların atılmasının tərəfdarı deyilik. Naxələfliklə bağlı da böyük siyasi təcrübəmiz var”.

Qeyd edək ki, “İnsan naminə” seçki blokunda VİP, Liberal Partiyası və Yaşıllar Partiyası təmsil olunub.