Daxili siyasət

Ana səhifə

Daxili siyasət

Hakim partiyanın sədri müavini “Azərbaycanın işğal olunmuş əraziləri haqqında” qanunun qəbul olunması təklifi ilə çıxış edib

21 dekabr 2010 10:05 (UTC +04:00)

YAP icra katibi, millət vəkili Əli Əhmədov qeyd edib ki, bununla bağlı Avropa Parlamentinin sədrinə göndəriləcək məktubda münaqişə ilə bağlı onun öz mövqeyi də öyrənilməlidir: «Mən təklif edirəm ki, öyrənək görək Avropa Parlamentinin sədrinin özü Dağlıq Qarabağ probleminin Azərbaycanın ərazi bütövlüyü çərçivəsində həllinə tərəfdardır, ya yox?»

Ə. Əhmədov onu da qeyd edib ki, “Azərbaycanın işğal olunmuş əraziləri haqqında” qanunun qəbuluna ehtiyac var. Bu qanunda beynəlxalq təşkilatların hansı rejimdə bu ərazilərə gedə biləcəyi, onlara hansı sanksiyaların tətbiqi və s. əksini tapmalıdır.

Millət vəkili Qüdrət Həsənquliyev də Ə. Əhmədovun təklifini dəstəkləyib. Millət vəkili qeyd edib ki, Gürcüstanda analoji qanun var və Azərbaycan da bu təcrübədən istifadə etməlidir. Q. Həsənquliev onu da əlavə edib ki, parlamentin nizamnaməsinə dəyişikliklər edilməli, parlamentdəki digər partiyaların nümayəndələri Milli Məclisin rəhbərliyində təmsil olunmalıdırlar. Deputat eyni zamanda parlamentdə Qarabağ, Avrointeqrasiya və digər komitələrin yaradılmasını təklif edib.

Deputat Fazil Mustafa isə «Siyasi partiyalar haqqında» yeni qanunun hazırlanması təklifi ilə çıxış edib. Deputat bununla bağlı Milli Məclisdə komissiyanın yaradılmasını təklif edib.

Vitse-spiker Bahar Muradova da «Siyasi partiyalar haqqında» qanunun yenidən işlənməsinə ehtiyac duyulduğunu dilə gətirib: “Qanun bu günün tələblərinə cavab vermir. Bu qanun yenidən işlənməli, müasir tələblərə uyğunlaşdırılmalıdır”.

Deputat Sabir Rüstəmxanlı da parlamentdə təmsil olunan müxalifət partiyalarının Milli Məclisin rəhbərliyində təmsil olunması təklifini səsləndirib. Deputat eyni zamanda təklif edib ki, parlamentdə Xaricdə yaşayan azərbaycanlılarla iş üzrə komitənin yaradılmasına ehtiyac var.

Deputat Məlahət İbrahimqızı isə ABŞ Konqresinin Nümayəndələr Palatasında qondarma «erməni soyqırımı» məsələsinin müzakirəsinə toxunub. Deputat qeyd edib ki, bu gün Milli Məclis yubanmadan ABŞ Nümayəndələr Palatasına müraciət göndərməli, buna etirazını bildirməlidir.

Dağlıq_Qarabağ