Daxili siyasət

Ana səhifə

Daxili siyasət

Qarabağ Azadlıq Təşkilatı Ali Məclisi ilin yekunlarına dair iclas keçirib

27 dekabr 2010 10:43 (UTC +04:00)

Bakı. Ramil Məmmədli-APA. Qarabağ Azadlıq Təşkilatı (QAT) Ali Məclisinin ilin yekunlarına dair iclas keçirib.

QAT mətbuat xidmətindən APA-ya verilən məlumata görə, iclasda Dağlıq Qarabağ münaqişəsinə dair danışıqların davam etdirilməsinə ehtiyac olmadığı, hərbi əməliyyatların başlanmasının labüdlüyü, cəmiyyətin müharibə qanunları ilə yaşamasının zəruriliyi vurğulanıb və təşkilatın mövqeyini əks etdirən bəyanat qəbul olunub. Bəyanatda bildirilib ki, Dağlıq Qarabağ münaqişəsinin nizama salınmasına dair aparılan danışıqlar heç bir nəticə verməyib, beynəlxalq qurumların məsələyə obyektiv yanaşacaqlarına olan ümidlər özünü doğrultmayıb, ATƏT-in Minsk Qrupunun vasitəçilik missiyası iflasa uğrayıb: “Azərbaycan ləngimədən hərb yolunu seçməli, dövlət və cəmiyyət müharibə vəziyyətinə uyğun həyat və fəaliyyət tərzinə keçməlidir. Bütün səviyyələrdə “xalq diplomatiyası”ndan imtina edilməli, ermənilərlə qarşılıqlı səfərlərə son qoyulmalı, Bakıda keçirilən beynəlxalq tədbirlərə düşmən ölkənin nümayəndələri dəvət olunmamalıdır. Azərbaycan hakimiyyəti işğalçı Ermənistanın rəsmiləri ilə bütün görüşləri və danışıqları dayandırmalıdır”.

Bəyanatda KİV-lərdə hərbi vətənpərvərlik yönümlü verilişlərə üstünlük verilməsinin zəruriliyi də qeyd olunub: “Azərbaycan Ordusunda olan problemlərin aradan qaldırılması məqsədi ilə orduya real ictimai nəzarət təmin edilməlidir. İşğalçı Ermənistana qarşı müharibənin ləngidilməsi Azərbaycanın milli maraqlarına xəyanət kimi dəyərləndirilməlidir”.