Daxili siyasət

Ana səhifə

Daxili siyasət

Zəlimxan Məmmədli: “Artıq İctimai Palatada siyasi ambisiyaların önə çıxmasının elementləri görünür”

06 yanvar 2011 11:37 (UTC +04:00)

Bakı. Ramil Məmmədli - APA. “Mən də narazı namizəd olaraq, İctimai Palatada təmsil olunuram. Ölkədə baş verən neqativ hallara ictimai müqavimətin təşkil olunmasının tərəfdarıyam. Prinsiplər, ideya, siyasi xətt vahid olmasa və yekunda bu qurum siyasi təşkilatların ambisiyalarının mübarizə meydanına çevrilsə, onun perspektivinin olmadığını da demişəm. Açığını, bu qurumda siyasi ambisiyaların önə çıxmasının elementləri görünür”. Bunu APA-ya açıqlamasında Klassik Xalq Cəbhəsi Partiyası (KXCP) Ali Məclisinin keçmiş sədri, partiyanın sıravi üzvü Zəlimxan Məmmədli deyib.

Z. Məmmədli hesab edir ki, siyasətə baxış sistemi dəyişməlidir: “Azərbaycanın dəyişməsindən danışırıq, amma birinci növbədə insanlar dəyişməlidir. Xüsusilə Azərbaycanı dəyişməyə iddialı olanlar dəyişməli, yeni yanaşmalar ortaya qoyulmalıdır. Köhnə, zaman-zaman iflasa aparan metodlarla yenidən bir qurum yaradıb onu da iflasa aparacağıqsa, nəticə əldə edə bilməyəcəyik”.

KXCP-nin İctimai Palatada təmsil olunmamasına gəlincə, Z. Məmmədli deyib ki, partiyanın həmin palatada təmsil olunmamasını təqdir etmir: “İstərdim ki, bizim partiya da orada təmsil olunsun. Ayrı-ayrı hallarda KXCP-nin orada olması ilə bağlı sağlam təşəbbüslər olub. Son anda İctimai Palatada təmsilçilikdən imtina edilməsini isə düzgün saymıram. Vaxtilə də buna bənzər hallarla rastlaşmışıq. Hər şey hazırlanır, sonda isə qəfil qərar gəlir”.

Z. Məmmədli KXCP-ın fəaliyyətindən narazı qaldığı məqamların olduğunu da açıqlayıb: “Bunun da köklü əsasları var. Zaman-zaman sübut olunub ki, bir vaxtlar haqsız görünə bilən fikirlərimdə və tənqidlərimdə doğru olmuşam”.

O, partiyanın Xətai rayon təşkilatının üzvü olsa da, rayon təşkilatının partiyanın iyunun 24-də keçiriləcək ikinci qurultayına hazırlıqla bağlı hesabat-seçki konfransının keçirilib-keçirilmədiyindən xəbərsizdir.

Partiyanın rəhbər strukturlarında təmsil olunmaq üçün qurultayda namizədliyini irəli sürəcəyini istisna etməyən Z. Məmmədli deyib ki, proseslər sürətlə inkişaf edir, bu səbəbdən də hələlik konkret mövqe açıqlaya bilməyəcək: “Açıq deyə bilmərəm ki, partiyanın rəhbərliyində təmsil olunmaq istəmirəm. Baxmayaraq ki, çoxlarının can atdığı postdan vaxtilə imtina etdim. Demək istəyirəm ki, siyasi proseslərə biganə deyiləm və özümü prosesin içində hiss edirəm”.

Partiya sədrliyinə namizədliyini verib-verməyəcəyinə gəlincə, Z. Məmmədli bunu da istisna etmir: “Hər şey ola bilər. Amma bu gün planımda belə bir şey yoxdur”.

İctimai_Palata